La cuschina – quai è ses mund. Suenter ses emprendissadi da cuschinier en l'Hotel Schweizerhof a Flem ha Martin Sialm lavurà durant pliras stagiuns da Lai fin a Crans-Montana. Durant quest temp è el dentant er adina puspè turnà a Mustér per sa gidar en l’Hotel Alpsu ch’el ha lura, ensemen cun sia dunna, surpiglià dals geniturs la fin dal 1995, quai en quarta generaziun. Dapi 11 onns è el schefcuschinier en l’ARGO a Glion, la Fundaziun grischuna per lavuratoris e dimoras per persunas cun impediments.
Jau vom mintga di cun grond plaschair a lavurar per cuschinar bunas tratgas burgaisas.
En la cuschina da l’ARGO a Glion survegn Martin Sialm er sustegn d’in segund cuschinier sco er da tschintg persunas cun impediments. Di per di vegn cuschinà en media 150 fin 180 gentars, quai betg sulet per ils cussadents, mabain er per externs sco er per diversas scolas da la regiun. Sper il cuschinar tutga tar la lavur da Martin Sialm anc l'organisar, planisar e controllar.
Jau sun mai ì gugent a scola, perquai han mes geniturs er tramess mai en in internat.
Campiun mundial da capuns
Cun strusch 30 onns ha Martin Sialm surpiglià l’Hotel Alpsu a Mustér, quai dals geniturs che vevan manà l’hotel durant passa 20 onns. El enconuscheva bain quest manaschi uschia che quai na saja stà nagin problem. Ensemen cun sia dunna ha el manà l'Hotel Alpsu fin il 2010, avant che vender l'hotel a la sora Annalisa ch’ha manà 20 onns la Pizzeria Surselva gist da l’auter maun da la via. Martin e sia dunna, in team ch’ha collavurà fitg bain. Martin en cuschina, Stephanie en il restaurant ed en il biro. Durant quest temp èn els er daventads «campiun mundial da capuns». Cun la tratga da capuns avevan ils geniturs però cumenzà e gia da lezzas uras avevan ils capuns cuntanschì in status da cult en l’Hotel Alpsu.
La passiun per il cuschinar hai jau franc ertà da mia tatta e da mia mamma che cuschinavan fitg bain e gugent.
1'000 giadas cun velo tras la Ruinaulta
Sper la lavur en cuschina giauda Martin Sialm cunzunt ses hobis en la natira. Dasper il dar golf ch’el fa gia dapi prest 30 onns, ha el avant dus onns cumenzà ad ir a pestga. Seser sper in lai e far nagut, giudair il ruaus, quai saja grondius, di Martin Sialm. E cun ir a pestga haja el er sentì ch’i fetschia bain da vegnir in zic pli ruassaivels. E gia dapi ses emprendissadi va el cun velo. Er il viadi a la lavur da Panaduz a Glion fa Martin Sialm, sche l’aura lubescha, adina cun il velo. Prest milli giadas ha el uschia gia fatg quest viadi tras la Ruinaulta.
