Marella - Il viadi aventurus d’in da Lumbrein a Mauritius

Ozendi dura in sgol da Paris a Mauritius be 11 uras. L'onn 1765 era quai in viadi da 4'000 uras – en bartga sur la mar. Sin ina da quellas bartgas è er Gion Casper Collenberg stà passagier. El raquinta dal viadi d'in mez onn.

Il giuven chombrer da Lumbrein Casper Collenberg accumpogna ses patrun, in ritgun da Paris, sin l'insla colonisada dals Franzos. Per ses confamigliars en Lumnezia scriva el in rapport detaglià da quest viadi che dura in mez on e che oscillescha tranter lungurella da plum e cumbats per vita e mort.

Per sfegliar en las memorias da Collenberg

El descriva la vastezza da la mar, el rapporta da las baraccas dals mariners, el raquinta da sias temas d'inscuntrar sirenas ed el documentescha il sistem brutalischem da sclavaria che regia sin l'Île de France (Mauritius).

Il linguist Michele Badilatti ha transcrit, analisà e rendì public quest document rumantsch da valur istorica. En discurs cun Anna Serarda Campell parta el las aventuras dal simpel giuven da Lumbrein che s'ha fatg in num enfin tar la curt roiala franzosa.