Per ella èsi probablamain stà anc pli grev. Ella era quella en il zuppà. Ella aveva ina relaziun, ma na dastgava dir a nagin.
Er vegnir ordinà sco plevon è in ristg. Dubis restian. Ins na sa betg tge sfidas che spetgan e co ch'ins va enturn cun il celibat. Perquai saja el stà avert – sch’i na va betg, lura stoppia el trair las consequenzas. Ma en il mument da l’ordinaziun saja quai stà la dretga decisiun.
Il pli fitg mal hai fatg da stuair ma decider tranter duas chaussas ch’ins ha gugent.
Ils 15 da fanadur 2018 ha Marcel Köhle demissiunà sco plevon. Dapi lura è el in plevon suspendì, in plevon che na dastga betg pli lavurar. Per far il davos pass stuess el far il proceder da la secularisaziun – ch’ins metta il plevon en il stan dad in laic. Ma quest pass n’ha Marcel Köhle betg fatg.
Quest pass fiss memia stentus, quai fiss per mai in «Bittgang» e sin quai n’hai jau betg gì gust.
Tar ils cas d’abus sexuals di Marcel Köhle che la baselgia catolica vuless esser in’instanza cun ina buna morala. Ma insaco na gartegia quai betg ad ella. I fiss impurtant da star bun tar sbagls e surprender responsabladad. Quai fiss in grond pensum da la baselgia. In impurtant pass en connex cun las unfrendas d’abus sexual è da tadlar sin quellas.