Manuela Orlik - «Mes motto: na va betg, na datti betg»

Gastronoma, birolista, model, actura – la vita da Manuela Orlik è multifara. Cun 55 onns ha ella gia vis bler e pudì realisar bain inqual siemi. Gugent giauda ella dentant er il ruaus en la natira, saja quai cun far passlung u viandar, il pli gugent suletta. Er a cor stattan ad ella ils Stadis Unids, in pajas ch’ella ha gia visità pliras giadas.

Impressiuns da Manuela Orlik

Dapi sis onns maina Manuela Orlik l’ustaria Miraval sur Sumvitg en la vischinanza da Sogn Benedetg, quai cun l’agid da ses um e da l’entira famiglia. Cuschinar e preschentar differents menus sin il taglier per ses giasts è daventà per ella ina gronda passiun, e quai senza avair emprendì da gastronoma u da cuschiniera. Dasperas è Manuela Orlik er anc furnitura da té e lavura parzialmain tar il center da la plaiv refurmada Aua Viva a Mustér.

Cun 45 onns ha Manuela Orlik era fatg las emprimas experientschas sco model. Quai ha er avert ad ella la via da far il pass en il mund d’actura e giugar diversas rollas en reclamas per firmas ed a la televisiun. Insatge ch’ella n’avess mai cartì che daventi realitad. La devisa è dentant adina stada d’empruvar, pertge betg far saja il mender ch’ins possia far sch’ins veglia realisar in siemi.

Manuela Orlik è vegnida adoptada cun bun tschint onns ed ha survegnì ina nova vita en Surselva. Da ses emprims onns da sia uffanza n’ha ella betg bleras bunas regurdientschas. Cun 21 onns ha ella lura puspè tschertgà il contact cun sia sora. E cura che sia vaira mamma oriunda da l’Austria è morta ha Manuela era vis l’emprima giada ses dus frars.

Il bab che derivava da l’Italia n’ha Manuela Orlik mai gì la schanza da vesair ed emprender d’enconuscher. Quai ha laschà enavos bleras dumondas e sveglià grondas emoziuns. Cunquai stoppia ella viver, quai saja ina part da sia vita, di Manuela Orlik.