«Nus essan in product da la societad, in product d'in grond buatsch»!
Cun questa pretensiun procura Luca Maurizio, cabarettist e satiricher da la Bregaglia per perplexadad e provocaziun en ses program actual «Deus in Burnout». A moda filosofica e piztganta pareglia il satiricher il stadi da dretg cun in buatsch e sia simbiosa. «Jau vi dar al public ina nova optica da vesair las chaussas», di Luca Maurizio. Il program pulpì e divertent procura dentant era per ina tscherta lecziun da morala, el tutga magari sin il viv! En il program satiric filosofescha Luca Maurizio davart aspects socials e politics, problems etics e religius sco era economia e sexualitad.
Il Grischun sa chattia en ina sumeglianta situaziun sco avant 500 onns, di Luca Maurizio. «Societad, economia, politica e spiritualitad da l'uman èn oz sco lezza giada sin pliras cruschadas – ed ins na sa betg en tge direcziun ir».
La dumonda essenziala en ses program saja perquai: «Tge pudess nossa societad e nossa democrazia far per turnar a la medema creativitad e forza sco avant 500 onns?»
La societad – nus avain emblidà danunder che nus vegnin
En il territori da las Trais lias, ina regiun pauc furmada e paupra nua che catolics, refurmads e heretichers han vivì pli u main en harmonia durant prest 100 onns – esi reussì avant 500 onns da «patertgar grond». La regiun da las Trais lias era avant 500 onns circumdada d'ina Europa marcada ferm da guerras religiusas e cumbats per possess.
La societad haja emblidà sia derivanza – e perquai saja la teoria dal buatsch u la teoria dal humus in bun exempel, di Luca Maurizio. Tant il sistem d'in stadi liber sco era il sistem dal humus dal buatsch funcziunian mo lura bain, sche la spiritualitad, la societad, la scienza ed l'economia vivian en simbiosa e harmonia.
