Per passa 404’000 persunas en Svizra n’è la pandemia da Corona betg passada. 4'000 dad ellas hajan sintoms uschè grevs ch’ellas na possian betg pli lavurar, calculescha dr. Gregory Fretz, spezialist da long-Covid a l’Ospital chantunal dal Grischun.
Consultaziun long-Covid a Cuira
Dapi il mars 2020 chattan pertutgadas e pertutgads sustegn a l’Ospital chantunal a Cuira. Il post da consultaziun, ch'i dat qua, porscha oz regularmain agid e sustegn a 400 persunas.
Qua chattan ellas infurmaziuns da tut gener, davart dumondas medicinalas e da terapias fin a sustegn per tractar cun uffizis ed instituziuns u ina gruppa d'agid a sasez.
Questa consultaziun è tschertgada ed il temp dal medi principal, Gregory Fretz, limità. Perquai porscha la tgira specialisada maun.
Sustegn sin il lung viadi cun long-Covid
Annina Gees è ina da las expertas che lavura en la tgira specialisada da long-Covid. En sia lavur vegn ella confruntada di per di cun las numerusas sfidas, a las quala che pazientas e pazients da long-Covid èn exposts. Ed Annina Gees sa er, quant impurtant ch'igl è che la malsogna vegn prendida seriusa:
Jau crai ch’i gida a tut ils pazients, sch’ins discurra da la chaussa, sch’els vesan ch’i vegn prendì serius ed er che nus purtain il tema or en la societad. Long-Covid è ina malsogna. Ins na duai betg dumandar il pazient, oh, na pos puspè betg u ès ti puspè malsaun, ma prender serius el e dumandar, tge dovras oz u co poss jau gidar a tai?
En la Vita e cretta raquinta Annina Gees da sias experientschas en la consultaziun da long-Covid e da quai ch'è impurtant per las persunas pertutgadas.
