L’autura e poetessa Leta Semadeni da Lavin è vegnida undrada cun il «Grond premi svizzer da litteratura», quai per sia ovra cumpletta. Ella scriva en emprima lingia poesias en rumantsch u en tudestg e las translatescha mintgamai sezza en l’autra lingua.
En sia laudatio ha prof. Rico Valär ditg che Leta Semadeni lavuria en maniera creativa cun la plurilinguitad litterara. Sia creaziun litterara multifara enritgescha la litteratura rumantscha, tudestga e svizra.
Jachen Andry survegn in dals premis da litteratura
In premi svizzer da litteratura per ina publicaziun ha survegnì Jachen Andry per sia emprima collecziun da poesias «be cun rispli». Concentraziun linguistica, sensibilitad intellectuala, finezza musicala e tematica urgenta distinguian quests vers concis deditgads a regurdientschas, impressiuns e reflexiuns davart existenza ed apparientscha.
Premi per cudeschs d'uffants e giuventetgna per «le Colibri»
L'autura giurassiana, Elisa Shua Dusapin e la illustratura Hélène Becquelin da Losanna han gudagnà il premi per cudeschs d'uffants e giuventetgna svizzer 2023, ch'è dotà cun 10'000 francs. Als dis da litteratura a Soloturn èn ellas vegnidas undradas per lur cudesch per la giuventetgna cun il titel «le Colibri»,ina graphic novel. Ella raquintia a moda profunda e tutganta sur da las midadas en la vita d'ina persuna giuvna, argumentescha la giuria.
Leta Semadeni avant la surdada
Leta Semadeni ha scrit lirica, prosa curta, romans e cudeschs per uffants e quai en vallader ed en tudestg. En sias poesias en duas linguas perscrutescha la poetessa da Lavin barrieras linguisticas e gioga cun spazis intermediars e mistics nua ch'animals han ina funcziun impurtanta. «Adüna darcheu/aintran/luotin/bes-chas/aint in meis destin»: ina vulp, ina chavra, giats, chauns ed adina puspè utschels. Tenor la giuria è l’ovra da Leta Semadeni d’ina bellezza aspra, che n’irritescha betg mo sias figuras, ma era il lectur e la lectura.
Ils texts da Leta Semadeni èn vegnids translatads en franzos, talian, spagnol, tschec, englais e russ. 2011 ha ella survegnì in premi Schiller per sias poesias «In mia vita da vuolp/In meinem Leben als Fuchs», 2016 in premi svizzer da litteratura per il roman «Tamangur» e 2017 il premi da cultura grischun.
Il Grond premi svizzer da litteratura vegn mintgamai surdà per in’ovra da la vita ed è dotà cun 40'000 francs. Era l’onn passà è il Grand Prix Literatur ì ad in autur grischun, a Reto Hänny.
