«Cura ch’il Segner ha repartì ils talents, ha Cla Biert franc clamà intginas giadas «preschent»!». Quels pleds dad Andri Peer resumeschan bain l’impressiun ch’ins po avair sch’ins guarda sin la vita da Cla Biert.
Sper l’esser magister (Scuol, Ftan, Zuoz e Cuira) è il «cumpogn universal» Biert stà autur, trubadur, collecziunader da chanzuns popularas, actur ed autur da cabaret ed insumma, in represchentant engaschà da la cultura rumantscha.
Questa stad pudess Cla Biert festivar ses 100avel natalizi. La Marella propona perquai in inscunter uschè direct sco pussaivel cun Cla Biert e lascha resunar tuns or da l’archiv.
Ella n’ha numnadamain perdì nagut da sia forza, la vusch marcanta da Biert! Ina ch’Oscar Peer ha descrit ina giada sco «ina vusch che tegneva la ballantscha tranter passà e preschent».
