Il 1980 fundescha Armin Caduff in ensemble che porta l’emprim il num Trubadurs Sursilvans e pli tard La Compagnia Rossini. Per celebrar ils 40 da quest ensemble sa decida el da cumponer in musical rumantsch che gioga en il vitg fictiv Frisal. Pervia da la pandemia arriva il musical ussa sin tribuna cun dus onns retard, ma cun tant dapli plaschair.
Jau hai puspè ina giada vulì scriver insatge agen ed il pli gugent scriv jau en quest stil da musical che regorda a Weill e Gershwin.
«Frisal – Frisal» – la versiun da 1979 e quella da 2022
Il titel «Frisal – Frisal» as vegn insaco avant enconuschent ? Bain pussaivel, perquai che gia il 1979 aveva Armin Caduff scrit in musical rumantsch cun quest titel. Ed il success da quest’ovra ha lura era gì influenza sin la direcziun da sia carriera. Da preschentar ussa la cuntinuaziun da «Frisal – Frisal» è pia ina sort da punt enavos en il temp, ma cunzunt duai quest nov musical esser in regal a las generaziuns futuras.
La Marella cumpareglia ils dus musicals e fa visita ad intginas da las emprovas finalas da «Frisal – Frisal».
