RTR è actualmain en viadi. En differents lieus presenta Radiotelevisiun Svizra Rumantscha las emprimas trais parts da la seria fictiva «L’ultim Rumantsch». La seria fictiva è vegnida realisada dad RTR ensemen cun Shinging Film da Turitg.
Drama da famiglia
En il center da la seria stat la famiglia Durisch, possessura e gestiunaria da la pli gronda chasa da medias dal Grischun. Cura ch’il patrun e fundatur Gion-Peder mora, cumenza in cumbat da pussanza a l’intern da la famiglia. En ses testament ha Gion-Peder resguardà sia biadia Ladina che viva en l’exil turitgais. Ladina è in’activista incharnada che s’engascha vehementamain per ils dretgs dals animals e per la protecziun dal clima – tematicas che fruntan sin resistenza en la chasa da medias tradiziunala. Ma gist ella duai ussa manar la «Posta», l’ultima gasetta rumantscha.
Public ha gì plaschair
La seria fictiva è vegnida realisada sco film da kino. L’istorgia da la famiglia Durisch vegn raquintada en tschintg differentas episodas. Las emprimas trais ha il public a Müstair pudì vesair a la premiera dal film mesemna saira. Questas emprimas trais episodas han plaschì bain al public. Interessant, divertent, tematisà problems actuals ed anc filmadas en la regiun. Quai eran in pèr da las reacziuns. Anc mai han ins vis uschè ina producziun – ed alura anc per rumantsch, èsi stà d'udir dal public.