Gianna Olinda Cadonau è creschida si en l’Engiadina Bassa cun Chalandamarz ed Hom Strom sco tut tschellas e tschels giuvens da sia vegliadetgna er. E tuttina vegn ella adina puspè confruntada cun la dumonda: Danunder vegns?
Sche jau fiss alva, na survegniss jau betg quella dumonda. Sche jau fiss alva, bastass la resposta: Cuira u Engiadina Bassa. Ma perquai che jau na sun betg alva, vai vinavant e daventa lura intim – e tutga istorgias u er temas ch'èn fragils, e ch'jau na vi betg discutar cun x-ina persuna en il context dad in small-talk.
Uschia sa mussa il rassissem adina puspè en la vita quotidiana, raquinta Cadonau. Sch'il vis-à-vis na crai betg ch'ella sa bain rumantsch, sch'il vis-à-vis lauda ses chavels stgirs ed è gia cun ses maun en sia chavellira, avant dad insumma dumandar, u apunta sch'il vis-à-vis è be mirveglias voyeuristicas e spera sin istorgias dramaticas da fugia e privel. Quai succeda er en il Grischun, er en l’ambient cultural u intellectual, nua ch’ella sco autura sa muventa.
Il Grischun n'è betg immun
Da questas experientschas ha ella quintà er en l'occurrenza «Scriver cunter rassissem – prelecziun e discurs cun Azad Sîmmo e Gianna Olinda Cadonau». La sairada en la Postremise a Cuira era en il rom da l'emna cunter rassissem. Quella ha gì lieu quest onn per l'emprima giada er en il Grischun.
Silence is no longer an option – il silenzi n'è betg pli in'opziun.
En la Vita e cretta dat l'autura invista en ses mintgadi sco persuna da colur e raquinta, pertge ch'il silenzi n'è betg in'opziun.
In curt sguard sin il palc
-
Bild 1 von 3. En dialog litterar tras il project «Weiterschreiben Schweiz» . La grischuna Gianna Olinda Cadonau ed il curd Azad Sîmmo èn en contact cun in dialog liric. Bildquelle: RTR.
-
Bild 2 von 3. Azad Sîmmo prelegia ses text «Samstagsmütter». Il text da l’autur curd raquinta in’istorgia enturn las dunnas che protestavan en la Tirchia cunter il regime che laschava «sparir» lur confamigliars. Bildquelle: RTR.
-
Bild 3 von 3. Dar enavos la vusch a persunas fugidas. Cun il project «Weiterschreiben» survegnan auturas ed auturs che han stuì fugir da lur patria in nov dachasa litterar en Svizra. Bildquelle: RTR.