La struva da violenza sa volva dapi in onn ensi. Morts, blessads, devastaziuns dapertut en il Proxim Orient. Ils basegns umanitars èn creschidas e creschan vinavant.
9 da 10 persunas han stuì bandunar lur da chasa en la Strivla da Gaza, blers pliras giadas. La populaziun ha memia paca aua e vivonda, l’access a medischina è grev e tuts vegnan adina pli flaivels.
La glieud ha cunzunt nagina perspectiva.
Dapi ils 7 d’october 2023 creschan ils problems, er ils economics. L’economia è collabada. Il sulet agid vegn da l’exteriur. Ma gidar è grev. Ovras d’agid – per gronda part cun collavuraturs indigens – ston annunziar lur moviments e laschar lubir quels. Ed igl è era fitg privlus per quels che gidan. Gia blers han per lur vita.
I sto esser fitg demoralisond da stuair viver là.
Co la situaziun dals ostagis Israelians è na sa Ernst Lüber betg. I na dat nagin’organisaziun d’agid ch’ha access tar lez.
Er la situaziun en il Libanon è greva. Cunzunt economicamain vai fitg mal cun il pajais. I vegn bain anc producì victualias, ma cunzunt la populaziun en il sid dal pajais sto pervia da bumbardaments bandunar lur dachasa.
Igl è in pajais che vegn scurlattà da crisas.
Il pli impurtant en l’entira regiun dal Proxim Orient saja ch’i dettia in armistizi, di Ernst Lüber. E ch’ils ostagis vegnian laschads liber. E che rauba possia vegnir transportada senza impediments en la Strivla da Gaza.
