Ils hits da radio 2024 - Quai èn las chanzuns emessas il pli savens

Mintg’onn datti chanzuns che francheschan en las ureglias e na bandunan strusch pli las paradas da hits, ils radios ubain ils chanals auditivs. Qua datti la survista en las categorias «hits rumantsch», «hits svizzers» e «hits internaziunals».

Ils hits rumantschs

L’onn 2024 han diversas artistas ed artists rumantschs publitgà musica nova. Sin il 5avel plaz da nossa rangaziun prenda il chantautur sursilvan Mattiu plaz cun sia chanzun «Emblida mai». La chanzun è da chattar sin l’EP «Da casa» ch’è cumparida la primavaira. Sin plaz quatter datti ina collavuraziun sursilvan/surmirana. Marco Grischott chanta ensemen cun Stefanie Netzer «364 Gis». Per il duo da pop electronic ladunna è il 2024 stà in onn da success. Chiara Jacomet e Momo Kawazoe han pudì sunar en l’entira Svizra ed han preschentà lur musica en radios en l’entira Svizra. Tranter auter era lur single «il parasit». L’engiadinaisa Bibi Vaplan che abitescha e lavura a Lumbrein en Val Lumnezia chanta en «Culurio» dal planet principal da ses agen Popcorn Universum. Il plaz sisum il podest va ad in ulteriur duo. Gino Carigiet e David Friedli che sa numnan dapi curt omisdus ed han cun «scoletta» publitgà la chanzun rumantscha ch’è vegnida emessa il pli savens durant il 2024.

Ils hits svizzers

I dat ils classichers svizzers che tuts enconuschan: Alperose, 079, Schwan e co quellas chanzuns han tuttas num. 2024 è ina ni l’autra vegnida tiers che pudess tut tenor era ina giada daventar in classicher. Sin plaz tschintg da la rangaziun è «Champions» da la gruppa da Bienna e lur chantadur Noah Veraguth. Questa stad han Dabu Fantastic durant ils festivals tschertgà Aline enstagl da Helga. Lur chanzun «Aline» che raquinta d’ina romanza che ha cumenzà tar in Open Air è sin plaz quatter. La medaglia d’argient datti per la newcomra da Turitg Ladina e sia single «High Hopes». Var 1 milliun streams ha Nicola Keringer alias Nickless cuntanschì il 2024 cun «Don’t Stop The Car» tar RTR datti per quai il segund plaz. La victura da nossa rangaziun svizra va a la chantadura Naomi Lareine e «Colorblind». Ina chanzun ch’è s’allontanada in pau dal R&B tar in stil pli pop.

Hits per rumantsch

Ils hits internaziunals

Betg fitg surprendent è englais la lingua che dominescha ils hits internaziunals dal 2024. Almain datti dentant divers dialects englais tranter quels hits. Sco per exempel il plaz tschintg da la rangaziun che va al scot Calvin Harris che ha producì ensemen cun il chantadur brit Rag’n’Bone Man la chanzun «Lovers In A Past Life». Per il mument fa la chantadura da Florida Ariana Grande plitost furori cun ses film Wicked. Ella fa dentant anc adina musica ed ha cun «We Can’t Be Friends» era quest onn publitgà in hit. Sin plaz trais è ina chantadura ch’è dapi 2015 giast regular en las paradas da hits globalas: Dua Lipa cun «Training Season». In’exota tranter las americanas ed ils englais è sin il segund plaz da la rangaziun: Ásdís María Viõarsdóttir ubain simplamain Ásdís co la chantadura islandaisa sa numna ha cun «Flashback» puspè ina giada publitgà in’atgna chanzun. L’emprim plaz va ad ina chantadura ch’è disada vid records e premis. Cun «Texas Hold’em» ha Beyoncé dentant fatg surstar il mund musical. Per ina giada n’ha ella fatg nagina chanzun da R&B mabain ina da country – in novum per la chantadura e sco dunna da pel stgira era in’excepziun per quest gener da musica.

La survista da las top chanzuns tar RTR en las trais categorias: Rumantsch, svizzer ed internaziunal per tadlar: