Flurina Sgier ha in’atgna pratica a Glion e lavura er en l’Ospital chantunal a Cuira.
MTC n’è betg ina religiun – ma i ha schon era da far cun il cosmos, cun dar ragischs. Ma la clientella na sto betg avair in interess spiritual.
Il pli savens fa Flurina Sgier tractaments d’acupunctura. En l’ospital a Cuira vegnan tar ella cunzunt pazientas e pazients che han dolurs. Ma era a persunas che han ina terapia d’irradiaziun ni ina chemoterapia po l’acupunctura gidar, sco er tar mal il chau, problems cun ureglias ni nas. Medis e medias vegnian adina pli averts areguard l’acupunctura, respectivamain MTC.
Crair na ston ins betg. Igl è dentant segir pli positiv sch’ins crai che la terapia da MTC gida – lura va il process pli spert.
Sper sia lavur va Flurina Sgier d’Andiast gugent sin viadi. Dad ir en l’America per emprender englais haja dà in’energia speziala e mussà autras vias.
Il laschar encrescher per il lontan vegn adina pli ferm.
Il laschar encrescher per a chasa ha ella pli pauc. Flurina Sgier ha ina glista da «to-do» da lieus ch’ella ha il sentiment ch’ella stoppia anc avair vis. Sin questa glista èn lieus en l’America dal Sid ed er en l’Africa dal Sid. Ma il pli gugent fa ella viadi là nua ch’i n’ha betg blers turists.