Sia lavur è sia passiun e tuttina è sia passiun dapli che mo skis. Cun la marca e la firma Zai è Simon Jacomet daventà avant bun 20 onns tar in sinonim per skis ch’èn auters che quels giu da la stanga. Ed era per skis che custan tant sco auters dattan ora per in auto. Oz è Simon Jacomet lunsch davent dal mund luxurius ed exclusiv da sia anteriura firma Zai. Skis fa el dentant anc adina. L’impuls da perfecziunar quest sentiment en la storscha n'è pers gnanc in zic!
...per mai è in bun ski – quai tuna forsa curius – in che va bunamain da sez, in che dovra da mai uschè pauc forza sco pussibel, in che schai enorm fin, che glischna bain tras il caraun...
Suenter 15 onns Zai ed ina curta emprova cun ina firma nova, è Simon Jacomet ì ina nova via. Oz producescha el ses skis senza firma e senza investurs en ses pitschen atelier a Rabius. Il ski che porta sias inizialas vegn construì tenor sias ideas senza cumpromiss. La filosofia Jacomet para adina puspè dad esser ina maschaida dad art e far. Ina cumbinaziun da hightec e tradiziun. In «haregiar» suenter ils cunfins dal pussaivel.
