Ils emprims onns da sia vita ha Fadrina Hofmann passentà cun ses geniturs en l’Africa, en la Tansania. Ella na sa regordia betg grond da quest temp. Dentant è la dunna da 41 onns persvadida d’avair piglià cun sai da quest temp in pau la mentalitad africana.
Jau viv adina ferm en il preschent, quai è in dun african. Viver e giudair la vita, senza guardar adina enavos en il passà
Rapportar e scriver da tut quai che capita en la regiun, fa l’Engiadinaisa gugent e cun passiun. Il pli gugent scriva Fadrina Hofmann reportaschas u purtrets da persunas. Da cumbinar la lavur sco schurnalista, cun in pensum plain – ed educar il medem mument suletta ils dus uffants, quai saja stada ina sfida surtut ils emprims onns. Entant han ils uffants 13 e 15 onns e lubeschan d’avair dapli temp per ella sezza. Fadrina Hofmann s’engascha perquai sin differents palcs. Sin quel dal teater sco actura, scrivend cudeschs sco autura, u er sco commembra da pliras organisaziuns rumantschas.
A mai stat la tgira da nossa lingua e cultura ferm a cor. Perquai m’engasch jau er per exempel en la suprastanza da l’Uniun dals Grischs u per il Festival da teater Travers.
Recreaziun chatta ella adina puspè en la natira. Quella scuvra Fadrina Hofmann il pli gugent cun ses chaun Milo da tut las auras. Las spassegiadas cun el remplazzian il studio da fitness.
Sia passiun per il viagiar e las mirveglias per l’exotic emprovia ella da viver almain ina giada l’onn cun in viadi pli lung cun sia famiglia.
