Engiadina - La fascinaziun da l'atun dad aur

Fotografias per la concurrenza

Motiv preferì

Durant quest temp chatt’ins er plunas da fotografias e clips en las medias socialas. Maletgs, surtut da l’Engiadina, che mussan ils lareschs en lur colur da parada, fotografads amez la cuntrada.

In atun dad aur en Engiadina

Pionier tranter la bostga

Il laresch è s'adattà a las circumstanzas da la natira avant millis dad onns e sa deliberescha perquai – sco la bostga da feglia – er da sias millis da guglias pesantas avant l’enviern. La planta è er buna da surviver cun pauca aua ed in terren sitg e criv. Impurtant è dentant ch’il laresch haja avunda cleritad.

Ils lareschs creschan savens en autezzas da sur 1’500 meters sur mar ed èn surtut da chattar en l'Engiadina. Uschia derivan er 70% da la laina che vegn elavurada da la val dal laresch.

Laina lunara

Tranter auter vegn er tagliada la bostga da schembers e lareschs tenor il chalender da la glina. Quai per cuntanscher in lain pli sitg e resistent.

Trair a niz tut dal laresch, er la rascha

Entant che la laina da la planta vegn duvrada per l’elavuraziun da mobiglia, punts, fanestras e.u.v., fa er la rascha da laresch ses serv a nus umans. Annatina Egler da Scuol ha gia fatg numerusas giadas in «üt da rascha», pia ina pomada ch’è buna encunter inflammaziuns e feridas e surtut per trair ora spinas ch’èn idas sut la pel.

... ed a la fin: cullas da Segl

Cura ch’ils lareschs laschan crudar lur guglias ed il vent las buffa davent, platgan quellas tut tenor er en l’aua, sco per exempel sin il Lai da Segl. Tras undas evocadas dal vent dal nord, sa furman las guglias a cuschins loms radunds ch’han ina furma da culla. Quella è dapi plirs onns in’attracziun il november a la riva dal lai.

Isanza

En la mitologia sibirica è il laresch vegnì venerà sco planta mundiala. Er en il territori europeic vala el sco curativ. Ins di ch’el protegia da nauschs spierts, fieu e chametgs. A la notg da Walpurgis (30 d'avrigl) mettev’ins rotschas da laresch vi da portas en il territori alpin per stgatschar strias. Ditgas rapportan era da dialas da guaud e da sontgas dunnas che sa dattan d'enconuscher cun preferenza sut laresch als umans.