Marella – made in Bangladesh - Burdels e lavur en fabricas: uffants senza dretgs

Emprimas impressiuns

Situaziun politica e segirezza volatila

Che la situaziun en il Bangladesch è il mument tut autra che buna, mussan las indicaziuns dal Departament federal d’affars exteriurs. Il mument scusseglia quel urgentamain da far viadis turistics u betg urgents en il Bangladesch. Co la situaziun sa sviluppia saja intschert. Da tuttas uras possia la situaziun da segirezza sa pegiurar. Pervi da tensiuns politicas, etnicas e religiusas possia adina dar conflicts violents.

L’onn 2024 è stà marcà da midadas.

• Demonstraziuns, protests e tumults: Durant la stad hai dà en l’entir pajais demonstraziuns e protests. Tranter demonstrants e forzas da segirezza hai era dà violenza. Ins ha duvrà gas lacrimogen, sajettà cun ballins da gumma sco era cun muniziun da cumbat. Tschients persunas èn mortas, millis persunas èn vegnidas blessadas.
• Las raschuns: Cumenzà han las demonstraziuns perquai che la regenza vuleva reintroducir in sistem da quotas per plazzas en l’administraziun. Tenor la veglia da la regenza fiss ina gronda part da questas plazzas stada reservada per singulas gruppas, p. ex. per uffants u biadis da schuldada ch’ha cumbattì il 1971 en la guerra da deliberaziun da Bangladesch. I sa tracta da plazzas tschertgadas, cun bunas cundiziuns da lavur e che n’èn savens nunvisablas.

• Primministra demissiunescha: Tge ch’ha cumenzà cun las demonstraziuns da students cunter las quotas per jobs è suenter sa sviluppà a tumults envers la primministra Sheikh Hasina. Durant 15 onns ha lezza regì il pajais a moda pli e pli autoritara e la finala defendì ses uffizi cun agid da la polizia. L’entschatta avust ha ella demissiunà ed è scappada dal pajais. Tenor il Departament federal d’affars exteriurs è la situaziun sa calmada dapi lura, saja però anc adina volatila.
• Regenza ad interim surpiglia: Suenter la demissiun da Sheik Hasina ha ina regenza ad interim surpiglià. A la testa da quella regenza è Muhammad Yunus. Yunus è enconuschent perquai ch’el ha cumbattì cunter la povradad e survegnì il Premi Nobel da la pasch. Ils onns 1980 aveva el fatg lavur da piunier per cumbatter la povradad en il pajais, quai entras credits pitschens. Senza quels credits pitschens n’avessan questas persunas survegnì nagins daners da la banca.
• Elecziuns novas: La finamira da la regenza ad interim è d’organisar elecziuns novas. Cura che quellas èn, n’è anc betg enconuschent. Il suveran da Bangladesch ha la schelta tranter la partida veglia, sut l’anteriura primministra che stat per in sistem corrupt e da l’autra vart la partida religiusa e conservativa.
• Polizia e militar: Il mument è la situaziun da segirezza en il pajais tranter auter er intscherta, cunquai che tscherts policists fan chauma. La polizia vul numnadamain restar loiala a l’anteriura primministra. Cuntrari a la polizia n’ha il militar betg sustegnì la veglia regenza durant ils protests. Uschia ha il militar era gidà da furmar la regenza ad interim. Però, il mument na para quai betg ch’il militar avess interess vi d'ina rolla politica. In reschim militar n’è pia betg en vista.

Daulatia – in dals pli gronds burdels sin il mund

Trais uras viadi cun l'auto – ed alura cuntanschan ins Daulatia. En la vischnanca nua ch'è in dals pli gronds burdels sin il mund. Las dunnas che lavuran là vivan porta a porta cun las autras lavurantas da sex. Per part stattan ellas era cun lur uffants en las abitaziuns, nua che la famiglia dorma e nua che la dunna beneventa ils clients.

• var 1'500 lavurantas da sex
• tranter 300 e 400 dad ellas èn minorennas (questa cifra variescha tut tenor tgi ch’ins dumonda)

Ina che lavura là è Roji. Dapi l’onn 1988 è ella en il burdel a Daulatia, cun sia mamma e sora. Cun quants onns ch’ella ha cumenzà a lavurar e quant veglia ch’ella è uss na sa ella betg precis. Ella è circa 38 onns veglia. Ella ha in, dus u trais clients per notg. I dat era notgs che nagin vegn. Intgins clients restan in pèr uras. Auters restan l’entira notg e lura sto ella durmir il proxim di.

Intginas da las lavurantas da sex en il burdel n'enconuschan betg prevenziun sexuala. Sch’ina d’ellas vegn en speranza e survegn ina buoba, alura è la probabilitad gronda che quella lavura pli tard er en il burdel. Ils umens èn savens dependents da drogas. En questa vischnanca datti numnadamain paucas pussaivladads per il futur.

Intgins uffants survegnan la pussaivladad d’ir a scola. L’organisaziun d’agid internaziunala Save the Children ha creà intgins kilometers sper il burdel ina dimora. 39 buobas stattan là e van a scola. La gronda part dad ellas èn figlias da lavurantas da sex. En il burdel stattan var 500 uffants.

Igfah stat en questa dimora, ella parta sia chombra cun trais autras buobas. Ella è 17 onns veglia e viva dapi set onns là. Pli baud n'aveva ella nagina structura en sia vita. Ella era si fin tard la notg, ha d’in rar fatg la duscha, giugà bler cun auters uffants ed emprendì pauc.

Uss survegn ella trais giadas al di da mangiar, va a scola, gioga cun las autras buobas ed ha persunas per discurrer. En questa chasa protegida pon las buobas star enfin ch’ellas èn 18 onns. Suenter van intginas a studegiar u lavurar – intginas turnan dentant er en il burdel e fan la medema lavur sco lur mammas.

Rohingya – set onns en in champ da fugitivs

En il sid dal Bangladesch viva passa in milliun Rohingyas en il champ da fugitivs en il district Cox’s Bazar. En tut datti 33 parts en il champ da fugitivs – ils singuls champs. Nus, la gruppa da schurnalists e schurnalistas da la SRG SSR essan stads en il camp 3.

La vias èn stretgas e las tendas nua ch’ils Rohingyas stattan, èn ina sper l’autra. Las tendas han si logos d'organisaziuns d’agid. Questas èn stadas en ils ultims set onns fitg activas en il camp da fugitivs. Bangladesch na sustegna betg ils fugitivs, dat sulettamain il terren nua ch’il champ stat. Tut il rest – aua, da mangiar, products da higiena, vestgadira, chaussas da divertiment ed infrastructura – portan las organisaziuns.

In Rohingya è Ibrahim, el ha 17 onns ed è qua dapi set onns. El di ch’el sa sentia bain en il champ. Ibrahim è scappà, pertge che la regenza da Myanmar ha incendià sia vischnanca. Els hajan violà ils buobs e las buobas e destruì las chasas. Alura è Ibrahim scappà cun ina pitschna bartga sur il flum Naf.

Podcast Marella

Nus dain in cuc davos las culissas, explitgain e mettain en context, sajan quai fenomens novs, u istorgias pac enconuschentas.

Abunar

Serrar

• Copiar URL dal feed Copiar URL dal feed

Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.

Ulteriurs audios e podcasts

En il champ va el a scola, dentant na vala quest certificat nagut en il Bangladesch. Ses siemi è da daventar medi. En la proxima frasa di el dentant, che quai restia in siemi pertge che la cuminanza dals Rohingyas n'haja naginas schanzas.

En in’autra tenda stat Alkhama: Ella ha passentà insatge sumegliant sco Ibrahim. Er ella è fugida sur il flum, ella è dentant nudada. Ses frars èn vegnids mazzads a Myanmar. Alkhama è 20 onns ed ha tschintg uffants. Ella aveva da maridar cura ch’ella era anc ina buoba. Uss stat ella en ina tenda. Var tschintg sin tschintg meters è la chombra principala, lura datti ina cuschina ed in bogn ch’è en il liber.

A Myanmar ha ella lavurà en l’agricultura – ed Alkhama giavischa da pudair returnar in di. En il champ da fugitivs na sa senta ella betg segira. Propi gugent n'è ella betg qua, dentant è ella sa disada vi da questas circumstanzas.

Numnadamain èn las circumstanzas da viver en il camp precaras. I na dat betg avunda meds da higiena ed i vivan bleras persunas sin spazi fitg stretg. Per empruvar da mantegnair la segirezza na pon las persunas betg ir dad in champ en l’auter – ils 33 champs èn circumdads d’ina saiv. Durant il di saja la situaziun da segirezza buna. Il suentermezdi, vers la saira cumenza la violenza. Suenter las quatter surpiglia numnadamain la regenza da la notg – quai èn gangs criminalas. Uffants vegnan rapinads, dunnas vegnan mulestadas sexualmain e persunas vegnan feridas e cuppadas.

Tenor ina dunna ch’è savens en il champ da fugitivs cun in'organisaziun d’agid, saja questa violenza gronda pertge che las persunas n'hajan naginas incumbensas, naginas lezias e nagut da far l’entir di. En sasez na pon il Rohingyas betg ir or dal champ. Dentant van var 200 persunas anora a lavurar, en l’agricultura, a construir vias u tagliar bambus. La gronda part dals Rohingyas è qua dapi set onns – cura ch’els pon ir enavos u entrar a Bangladesch na sa nagin. 

Uffants lavuran per 10 raps al di

A Bangladesch abitan 170 milliuns persunas. 40 pertschient dad els èn uffants, pia 70 milliuns. Quai maina tar lavur d’uffants. Tranter dus e quatter milliuns uffants lavuran. Uschia er en ina fabrica da pesch setg a Cox’s Bazar, ina citad en il sid da Bangladesch che vala era sco lieu turistic.

A l'ur da la citad, direct sper in flum e sper la mar stat ina maisa suenter l’autra cun si pesch. Enturn ed enturn èn curunas nua che peschs setgs pendan. La fabrica è en il liber, uschia n'è l’odur betg uschè extrema co ch’ins s'imaginescha. Tar 35 grads èn uffants e dunnas vi da volver ils peschs sin las maisas. Quai èn las temperaturas d’enviern, la stad vegni enfin 45 grads. Qua lavuran per la gronda part famiglias ch'abitan direct daspera en il quartier da pestgaders. Quai èn enturn 10’000 famiglias.

Rokia è ina da las lavurantas – ses uffants e l'um lavuran er en la fabrica. Ella sezza gudogna ad in bun di 150 takas, quai è 1,10 francs. Ella sto prender ora il dadens dals peschs e setgar els. Ses um gudogna 300 enfin 400 takas al di, quai èn cnapp trais francs. Ed ils uffants van a ramassar il rument da peschs che croda giu da las bartgas u ch’è giu per terra en la fabrica. Per quai gudognan els var 10 raps al di. Quai para pauc, dentant è la famiglia da Rokia dependenta da questa paja.

En quest quartier da pestgaders datti er in local, nua ch’ils uffants pon ir dus dis a l’emna ad emprender. Quai è in project da l’organisaziun d’agid svizra Solidar Suisse. Igl n'è betg sco ina scola publica, ma igl è per ch’ils uffants hajan insumma in'educaziun. Il rest da l’emna lavuran els numnadamain en la fabrica da peschs setgs.