Dominique Caglia è autura e ha studegià rumantsch a l’Universitad da Friburg. Actualmain doctorescha ella e perscrutescha per la professura da didactica plurilingua cun accent sin il rumantsch a la Scola auta da pedagogia dal Grischun.
Adina puspè reflectar l’atgna tenuta, agens pregiudizis ubain l’atgna istorgia ed empruvar da vesair il mund cun ils egls dad autras persunas, quai è tenor mai fitg impurtant.
Cun l’experta ed entusiasta da lingua e linguistica ha Vita e cretta discurrì davart la toleranza en connex cun il diever linguistic. Nua sa mussa la toleranza ubain l’intoleranza en emprima lingia en la lingua? En tge situaziuns n’è Dominique Caglia persunalmain betg sa sentida tolerada u perfin discriminada sco Rumantscha? E – dastg’ins insumma discurrer da discriminaziun envers persunas rumantschas, damai che quellas discurran tuttas era tudestg? Nua chala la toleranza da Dominique Caglia?
Toleranza sto esser vicendaivla. Da mai envers persunas cun autra tenuta, ma era la renconuschientscha da l’autra persuna envers mai. I dovra l’engaschi cuntinuà da tuttas duas varts.
