Asa S. Hendry ha survegnì il Premi Term Bel 2018 per ses text «Binaris» che tracta l’adolescenza prematura dad ina giuvna.
En sia laudatio per il text di la giuria:
Persvadì la giuria han las differentas stresas da purtrets, sentiments e relaziuns. Ellas dattan al text ina profunditad, spessadad ed avertezza. Medemamain persvadì ha l’experimentaziun gartegiada en lingua e metafras.
Premi Term Bel 2018 – cun in nov modus
Il Premi Term Bel ha lieu mintga dus onns als Dis da litteratura a Domat. Quest onn ha midà il modus dal premi: Ils tschintg texts en la concurrenza finala n’èn betg vegnids prelegids da las auturas ed ils auturs mabain da l’actura Marietta Jemmi.
Pir dumengia suentermezdi è il public vegnì a savair tgi che sa zuppa davos ils tschintg texts. Ils finalists 2018 eran: «Curriculum» da Walter Roselli, «Quel di» da Tinetta Rauch, «Binaris» dad Asa S. Hendry, «Viadi i’l paradis» da Fadrina Hoffmann e «La curridura» da Viola Pfeiffer.
Mintga finalista e finalist ha survegnì 700 francs. Il premi dal public, dotà cun 1500 francs, va quest onn a Viola Pfeiffer ed il text «La curridura». Tut ils premis, inclusivamain il Premi Term Bel (3000.-) èn sponsurisads da la vischnanca burgaisa da Domat, ch'ha uschia redublà quest onn la summa dals premis.
Domat, il punct da cristallisaziun per la litteratura rumantscha
Er quest onn han divers auturs e chasas edituras publitgà lur ovras novas sin ils Dis da litteratura:
- Benedetto Vigne ha preschentà cun «Ils ventganov da settember» ses «primroman», in’istorgia apparentamain criminala plain fintas e fastizs faus.
- La victura dal Premi Term Bel, Asa S. Hendry, è vegnida a Domat cun il cudesch «Sin lautget» che raquinta d’in’amicizia nunusitada tranter ina dunna giuvna ed in’autur che va vers ils quaranta.
- Premiera a Domat ha gì er il cudesch d’uffants «La cigna», ina veglia paraula sursilvana raquintada da nov da Gabriela Holderegger Pajarola ed illustrada da Jacinta Candinas.
Success litterar e culinaric
In dals punct culminants era quest onn la tschaina da gala «Daletgs tranter lingias» da sonda saira.
Accumpagnà da schuppa, past principal, dessert e digestiv, servids en sala, han il clown Roberto Chiriatti, il musicist Simon Benz e la ballarina Seraina Siedler-Tall, il cabarettist Flurin Caviezel e la chantadura Sara-Bigna Janett, la chanzuniera Astrid Alexandre e la sautunza Riikka Läser procurà per intermezzos poetics, tuns lirics ed istorgias divertentas.
Dapli public ch'il 2017
Ils organisaturs tiran ina bilantscha positiva da questa 28avla ediziun dals Dis da litteratura. Cun totalmain radund 400 entradas durant l’entira fin d’emna ha l’ediziun dals Dis da litteratura attratg dapli public che l’onn passà.
D’attribuir è quai tenor las organisaturas tranter auter a la concurrenza litterara Premi Term Bel. Ed era la gestiun e la disciplina dal temp, ina sfida cun 20 puncts da program, ha funcziunà quest onn en favur dal public.
Ils 29avels Dis da litteratura han lieu dal 1. fin ils 3 da november 2019.
Ils Dis da Litteratura 2018 – en intginas impressiuns
-
Bild 1 von 13. Il comité d’organisaziun: . Corina Schmed, Natalia Tuor, Sara F. Hermann, Sereina Nay e Nadina Derungs. Bildquelle: RTR.
-
Bild 2 von 13. Sara F. Hermann cloma en sala, nua che la moderatura Maria Victoria Haas spetga gia. Bildquelle: RTR.
-
Bild 3 von 13. Il duo schön & gut ha preschentà il venderdi saira cabaret politic poetic. Bildquelle: RTR.
-
Bild 4 von 13. Radund 400 persunas han visità las numerusas occurrenzas als Dis da litteratura. Bildquelle: RTR.
-
Bild 5 von 13. Nagina memia giuvna per esser amatura da litteratura –. L'autura Gabriela Holderegger Pajarola e l'illustratura Jacinta Candinas signan La Cigna. Bildquelle: RTR.
-
Bild 6 von 13. Las bunas olmas en cuschina – . las dunnas da l’Uniun da dunnas Domat procuran per il bainstar culinaric. Bildquelle: RTR.
-
Bild 7 von 13. Concurrenza Premi Term Bel 2018 –. durant la prelecziun anonimisada dals texts en concurrenza. Bildquelle: RTR.
-
Bild 8 von 13. Concurrenza Premi Term Bel 2018 –. Bertilla Giossi, commembra da la giuria. Bildquelle: RTR.
-
Bild 9 von 13. Concurrenza Premi Term Bel 2018 –. l'autura Chatrina Josty en funcziun sco giurora. Bildquelle: RTR.
-
Bild 10 von 13. Concurrenza Premi Term Bel 2018 –. Rico Valär è er stà commember da la giuria. Bildquelle: RTR.
-
Bild 11 von 13. Concurrenza Premi Term Bel 2018 –. Romana Costa, la moderatura da la discussiun da la giuria. Bildquelle: RTR.
-
Bild 12 von 13. Il Tavulin litterar curt avant che vegnir en acziun –. Esther Krättli, Martìn Camenisch e Clà Riatsch. Bildquelle: RTR.
-
Bild 13 von 13. Bar cun ils cineasts rumantschs il venderdi saira. Bildquelle: RTR.
RR actualitad 06:00++