«Cur ch'jau sun vegnida en il Honduras avant 20 onns avev'jau il sentiment da pudair midar il mund, da pudair gidar tuts», sa regorda Patricia Scarpatetti. L'onn 2007 ha ella decidì d'emigrar e fundar l'atgna chasa d'uffants cun la finamira da dar ad uffants maltractads u bandunads in nov dachasa. Cumenzà ha tut cun otg uffants – oz sajan els sco ina gronda famiglia – cun 42 uffants e 19 emploiadas ed emploiads.
Patricia Scarpatetti e ses nov vitg
Ils ultims onns ha ella lantschà in nov project: in vitg cun 104 chasas per famiglias en pitgira. Naschida è l'idea l'onn 2020 cura che dus huricans han chaschunà grondas inundaziuns. 6'000 chasas èn vegnidas destruidas – in mez milliun persunas ha stuì fugir. La finamira è da dischlocar las famiglias da lur baraccas en in lieu pli segir che na po betg vegnir inundà.
La paupradad en il Honduras è extrema. Jau hai pensà ch'i saja simpel da chattar famiglias adattadas per las chasas. Ma la realitad è in'autra.
Per survegnir la chasa sco regal ston las famiglias ademplir differents criteris. Tranter auter ston ellas cumprovar ch'ellas n'han mai gì difficultads cun la giustia e la polizia ed ellas na pon betg fadiar dapli che 600 francs al mais.
Ina midada spectaculara
Delmy Delcid maina la pitschna stizun en il vitg. Ella è creschida si en ina chasa nua ch'igl ha dà blera violenza. Cun 10 onns è ella fugida da chasa, è vegnida a San Pedro Sula senza n'enconuscher nagut ed è sa tschentada sin via. Uss è ella per l'emprima giada si'atgna scheffa.
La midada en il nov vitg è stada ina midada spectaculara. Jau ma sent sco la pli ventiraivla dunna dal mund.
Il vitg e sias reglas
Il nov vitg «Unión y Esperanza» ha custà 1,3 milliuns francs. Daners che la fundaziun da Patricia Scarpatteti ha survegnì da sponsurs e donaturas. La fundaziun ha tschentà si reglas che las famiglias ston resguardar per che la convivenza en il vitg funcziuneschia. In punct central è che las famiglias tegnian urden en e sper chasa. «En il Honduras datti rument dapertut. Jau hai fatg cler che nus essan ina fundaziun svizra e che mintgina e mintgin ha da prender ensemen il rument. Nus na vulain betg educar las persunas mabain mussar tscherts trics per viver meglier», di Patricia Scarpatetti.
La finamira è d'occupar tut las chasas fin la fin da l'onn e da lura pudair inaugurar la nova scola ch'ha plaz per 250 scolaras e scolars. Patricia Scarpatetti viva dapi 20 onns en il Honduras e grazia a sia experientscha cun projects caritativs è ella persvadida ch'il project daventa in success.
Or da l'archiv