Alexi Nay e Marcus Hobi han creà en il decurs dals davos decennis veritabels semperverds. Chanzuns sco «Il clom dalla Greina», «Quei dat ei buc tier nus», «Surselva» e bleras autras fan bunamain gia part da la ierta culturala rumantscha. Ed il duo chanta anc adina, quest atun publitgeschan els dus lur tschintgavel album.
Students e chantauturs
Alexi Nay e Marcus Hobi emprendan d’enconuscher in l’auter a la recruta nua ch’els èn en la medema cumpagnia. Alexi Nay da Zignau aveva gist finì il seminari da scolasts. Suenter la recruta dat el scola in onn e va suenter a Friburg per studegiar scolast secundar. Marcus Hobi da Mels ha fatg la matura a Mustér ed emprendì là rumantsch. El va per in onn a Paris e silsuenter medemamain a Friburg.
-
Bild 1 von 10. 35 onns en dus –. in viadi tras il temp dad Alexi e Marcus. Bildquelle: mad / RTR, Petra Rothmund.
-
Bild 2 von 10. Lur cumparsa è simpla:. duas vuschs, ina ghitarra, ina flauta e forsa in tamburin. Bildquelle: mad / RTR, Petra Rothmund.
-
Bild 3 von 10. Partenza per la carriera musicala –. Alexi e Marcus en lur abitaziun da students a Fribourg ils onns 80. Bildquelle: mad / RTR, Petra Rothmund.
-
Bild 4 von 10. «Quei dat ei buc tier nus» . è ina da las chanzuns che fa bunamain gia part da la ierta culturala rumantscha. Bildquelle: mad / RTR, Petra Rothmund.
-
Bild 5 von 10. Dus chantauturs populars da la Rumantschia –. Alexi e Marcus èn adina puspè tema per las gasettas. Bildquelle: mad / RTR, Petra Rothmund.
-
Bild 6 von 10. Bards muntagnards –. enconuschents gia il 1986 er sur ils cunfins grischuns or. Bildquelle: mad / RTR, Petra Rothmund.
-
Bild 7 von 10. Viadi sur cunfin –. l'amicizia dals dus chantauturs dura dapi ils onns 80. Bildquelle: mad / RTR, Petra Rothmund.
-
Bild 8 von 10. «In clom» cumpara il 1986 – . l'onn nua ch'els survegnan il Prix Walo. Bildquelle: mad / RTR, Petra Rothmund.
-
Bild 9 von 10. Il disc cumpact «Salischina» (2018) –. per quel collavuran Alexi e Marcus cun differents auters artists. Bildquelle: mad / RTR, Petra Rothmund.
-
Bild 10 von 10. «Alexi e Marcus – 35 onns en dus». è in film davart ina amicizia musicala unica en la Rumantschia. Bildquelle: mad / RTR, Petra Rothmund.
A Friburg è uschia l’entschatta dals onns 80 l’entschatta d’Alexi e Marcus. En lur abitaziun da students chantan, scrivan e cumponan ils dus giuvenots atgnas chanzuns. Bainbaud dumbra lur repertori 16 chanzuns. L’onn 1984 cumpara lur emprima platta: «Ina canzun».
Duas vuschs, ina ghitarra, ina flauta
Lur represchentaziun è simpla: duas vuschs, ina ghitarra, ina flauta e forsa in tamburin. Alexi e Marcus dattan quels onns 80 concerts dapertut. Els chantan per emissiuns da la televisiun, fan registraziuns per il radio e daventan dus chantauturs populars en la Rumantschia.
Enconuschents sur la Rumantschia
1985 scrivan els la chanzun «Il clom dalla Greina», ina decleraziun d'amur per questa cuntrada e per preservar la planira da la Greina dad in lai artifizial. Questa chanzun fa enconuschent ils dus chantauturs era sur la Rumantschia ora. L’onn 1986 cumpara lur segunda platta «In clom». Gliez onn survegnan els il pitschen Prix Walo. Be quatter onns pli tard publitgeschan els il terz album «Anavon».
Lur chanzuns tanschan davent d’ina chanzun populara vi tar ina descripziun da la natira, dad ina chanzun da protest enfin tar ina chanzun d’amur. L'onn 1990 vegnan Alexi e Marcus undrads cun il premi da cultura «Pader Flurin Maissen» ed in onn pli tard survegnan els il premi da promoziun dal chantun Grischun.
Nus vein mai calau.
Suenter ils onns 90 èsi pli ruassaivel enturn Alexi e Marcus. Omadus han famiglia e lavuran. Marcus Hobi è scolast secundar e viva a Vilters. Alexi Nay stat a Vella ed è inspectur da scola. Mintgatant dattan els in concert, plitost en in ravugl pli pitschen. Era sch’els na concerteschan betg pli uschè savens, chalà n’han Alexi e Marcus mai.
L’onn 2008, quasi 20 onns suenter il terz disc, cumpara «Salischina». En quella producziun collavuran Alexi e Marcus cun differents auters musicists.
«Alexi e Marcus – 35 onns en dus»
Alexi e Marcus èn dapi 35 onns ensemen sin viadi musical. Quest‘atun cumpara lur tschintgavel disc. Ina buna chaschun per purtretar il duo en in film documentar cun il titel «Alexi e Marcus – 35 onns en dus». En ina tura sur la Greina reflecteschan ils dus chantauturs lur istorgia ed els raquintan da lur messadis, plaschairs e reacziuns. «Alexi e Marcus – 35 onns en dus» è in film davart ina amicizia musicala singulara en la Rumantschia.
Il film «Alexi e Marcus – 35 onns en dus» da l'emissiun Cuntrasts mussa l'amicizia e la carriera musicala dad Alexi Nay e Marcus Hobi – dumengia, ils 14 d'avrigl 2019, a las 17.25 sin SRF1.
TR Cuntrasts 17:25