Las previsiuns turisticas eran bunas, collavuraturas e collavuraturs engaschads ed ils cudeschs da las reservaziuns plains. Per Men Juon e ses bain da chavals San Jon si sur Scuol avess la stagiun pudì cumenzar – ma er tar el, sco tar blers auters, ha il coronavirus midà tut.
80 chavals maglian tuttina
Men Juon ha 80 chavals sin ses bain. Intgins tutgan a privats, ma la gronda part dals animals è qua per la lavur. Quai vul dir per champs d'uffants, gitas curtas e chavaltgadas lungas – er da plirs dis – che van schizunt sur cunfin.
Ils chavals han dentant da vegnir pavlads e tgirads tuttina – i vul fain e fiers ed oravant tut collavuraturas e collavuraturs. Actualmain lavuran 4 emploiads a San Jon. Els furman gruppas da dus per pudair evitar ch'ina infecziun tschiffa a tuts.
Las entradas èn persas per dal bun
Gia uss fissan stads curs dad ir a sella. Sper las chavaltgadas avessan duvrà ils giasts las stanzas e mangià en il Saloon, il restorant da San Jon. En pauc temp fissan vegnids ils emprims uffants als champs dad ir a sella.
Per noss manaschi èsi da differenziar ina giada il restorant e l’hotel, nua che nus n'avain nagina lavur pli. Dapi duas emnas è serrà tut. La stalla dad ir a sella è er serrada. Però nus duvrain ils lavurants per tgirar ils chavals.
Fin ils 19 d'avrigl sajan persas var 7% da las entradas, di Men Juon. Quellas na possia el betg pli prender si pli tard, cun quai ch'els hajan gì tantas bunas reservaziuns e sajan stads vendids ora.
El speria dentant anc adina, che la situaziun sa normaliseschia, avant ch'i vegnia fitg dir per ses manaschi. Quai fiss il cas, sche las restricziuns pervi dal coronavirus giessan fin en per la stad.