Dapi 10 onns stat «La Triada» per chanzuns popularas rumantschas, enconuschentas ed er da quellas bunamain emblidadas. Ellas arranschan quellas uschia ch’ellas survegnan in vestgi dal tuttafatg nov ed ellas expriman en moda intensiva plaschair ed allegria, melanconia e tristezza.
In onn nov ed in project che va autras vias
Per lur program nov dal 2022 preschentan las trais chantaduras ina furma da distribuziun insolita. In dals motivs che ha manà a questa idea èn er las experientschas ch’ellas han fatg ils ultims mais durant il temp da pandemia. Paucas emprovas, concerts annullads ed il contact cul public – essenzial per ellas – che ha mancà. Corin, Ursina ed Astrid han però vuli restar optimisticas ed han decis da prender per mauns in nov project.
12 mais – 24 chanzuns – 3 vuschs
«La Triada» preschentan il 2022 lur chanzuns novas en furma d’in abunament che custa 47 francs. A partir dals 5 da schaner datti mintga dus emnas ina nova chanzun, adattada a la stagiun ed ad eveniments. Uschia han ellas tschernì melodias sco: «Chalandamarz», «Canzung dagl Anviern», «Scha sün las alps eu füss» ubain «Bunas Novas».
In grond stgazi da melodias
Er questa giada èn la gronda part da quellas or dals archivs, per part melodias emblidadas ch' èn però anc adina actualas.
Gia il december è cumparida la chanzun «Virola virola» per lantschar la pagina d’internet e lur acziun. A partir dad oz datti lura mintga 2 emnas ina chanzun nova ch’ins po telechargiar. La fin dal 2022 datti tut las chanzuns er sin in disc.
