Nossa cuschina - Petta da lindornas da levon cun chanella

1 / 3

2 / 3

3 / 3

temp da preparaziun: ca. 30 minutas
temp da paus: ca. 2-3 uras
furma da pettas: ca. 25 cm x 11 cm

Ingredienzas

• 100 g latg
• 12 g levon frestg
• 300 g farina
• 75 g paintg
• 1 bagiauna da vaniglia
• 2 ovs
• 1 presa sal
• 20 g zutger
• 40 g zutger brin
• 50 g quagliada
• 1 tschadun pitschen chanella
• 1 tschadun pitschen cacau da coier (senza zutger)
• 4 tschaduns gronds latg

 Preparaziun

• Stgaudar 100 g latg fin ch'el è tievi e dissolver lien 12 g levon frestg.
• Sbatter 1 ov cun ina furtgetta en ina cuppina.

Preparaziun da la 1. pasta

• Truschar la mesadad da la maschaida da latg (56 g) cun 140 g farina, 25 g paintg, la pulpa d'ina mesa bagiauna da vaniglia, 30 g quagliada, la mesadad da l'ov sbattì (ca. 25 g), ina presa sal e 20 g zutger ed empastar ca. 5 minutas ad ina massa guliva.
• Furmar la pasta ad ina culla e la metter en ina cuppa. Cuvrir cun in sientamauns da vaschella umid e laschar levar la pasta en temperatura da stanza 2-3 uras fin ch'ella è sa dublegiada.

 Preparaziun da la 2. pasta

• Truschar la mesadad da la maschaida da latg (56 g) cun 160 g farina, 50 g paintg, la pulpa d'ina mesa bagiauna da vaniglia, 20 g quagliada, la mesadad da l'ov sbattì (ca. 25 g), ina presa sal, 40 g zutger brin, 1 tschadun pitschen chanella ed 1 tschadun pitschen cacau ed empastar ca. 5 minutas ad ina pasta guliva.
• Furmar la pasta ad ina culla e la metter en ina cuppa. Medemamain la cuvrir cun in sientamauns da vaschella umid e laschar levar la pasta en temperatura da stanza 3-4 uras fin ch'ella sa dublegiada. 

Preparaziun da las lindornas da levon cun chanella

• Zullar las duas pastas levadas a dus rectanguls da mintgamai ca. 25 cm x 30 cm.
• Entagliar ca. 10 cm la pasta clera da la vart curta (vesair il video).
• Metter sisura la pasta stgira e rudlar en la vart curta, uschia ch'ils tagls èn a la fin sin la vart sura da la petta.
• La rolla duess esser uschè lunga sco quai che la furma da pettas è lada.
• Unscher la furma da pettas cun paintg e metter lien la rolla da pasta cun ils tagls vers ensi.
• Danovamain cuvrir la petta cun in sientamauns da vaschella umid e laschar levar ella 30 minutas en in lieu chaud.
• Prestgaudar il furnel sin 180 grads (chalira da sura e da sut).
• Penellar la petta cun latg.
• Far coier la petta ca. 35 minutas sin 180 grads (temperatura da sura e da sut), la cuvrir suenter max. 20 minutas cun folia d'aluminium ubain palpiri da furnel per evitar che la surfatscha vegnia memia stgira.