Andreas Caminada maina ses agen restaurant en l'hotel Schauenstein a Farschno en la Tumleastga, undrà cun trais stailas Michelin e 19 puncts da Gault-Millau. Il cuschinier da renum è ferm collià cun sia patria – il Grischun. Ils aromas tipics da noss chantun furman dapi blers onns il motiv principal da sia cuschina.
Il mangiar duai esser in viadi sensual – che lascha enavos in’impressiun durabla e che fa oravant tut fortunà.
Nossa moderatura Ladina Schena ha visità il cuschinier oriund da la Surselva en ses chastè a Farschno. Ella ha discurri cun el sur da la cuschina regiunala e stagiunala, ma era sur dal menu festiv. Per nossas audituras ed auditurs ha Andreas Caminada avert ses cudeschs da cuschinar, ha proponì in menu exclusiv per la festa da Nadal ed ha dà tips.
