La Chasa Jaura, il museum regiunal e center da cultura a Valchava, ha envidà il venderdi passà ad ina festa giubilara en occasiun da ses anniversari da 50 onns. Quest cumplion ha la Chasa Jaura festivà en furma d’ina «Jaurada», ina sairada ch'ha vulì render visibla la vusch e la cultura da la Val Müstair. Per questa festa entamez Valchava hai dà da vesair ed udir tschintg giadas cultura jaura – saja en la sala da la Chasa Jaura sezza u lura anc en auters lieus en il vitg, tranter auter er en ina garascha plain tractors.
En la baselgia refurmada da Valchava hai dà in revival da Wilhelm Tell. Ina gruppa da teater ad hoc ha numnadamain prelegì e giugà scenas or d'ina versiun jaura dal 19avel tschientaner da quest drama patriotic da Friedrich Schiller. Scrit aveva quella versiun il pader da Müstair Justinian Lombardin.
Per tgi che ha vulì far pausa u ha survegnì sait en il decurs da la saira, è stada averta ina piano-bar en la sala da la Chasa Jaura. Là ha il pianist Martin Camichel sunà durant l'entira saira evergreens e melodias rumantschas.
