Alois Carisch (57) e Mathilda Derungs (70) passentan gugent temps communablamain. Saja quai durant lur lavur sco calusters a Glion u era sin lur viadis enturn il mund. Avair sumegliants interess e parter ils hobis, insatge che saja gist uschè impurtant sco la libertad da pudair far chaussas persul. Avant 16 onns ha Alois Carisch vis sia Mathilda durant in'occurrenza da lotto ed ha prendì ensemen tut ses curaschi e pledentà ella. Insatge ch'el fetschia uschiglio atgnamain betg.
Cura ch'jau hai vis ses egls e ses surrir hai jau pensà 'quai fiss ina per s'inamurar'.
Alois Carisch è stà maridà duas giadas, Mathilda Derungs ha gì ina lunga lètg ed omadus han fatg experientschas ch'han marcà els e laschà enavos plajas en lur cors. Perquai èsi – cunzunt per Mathilda – stà a l'entschatta grev da sa laschar en sin ina nova amur. Era la differenza da vegliadetgna da 13 onns haja dà da patratgar ad ella – ma be a l'entschatta. Ussa na saja quai nagin tema pli.
Dapi nov onns èn els dus maridads ed Alois che n'ha sez nagins uffants è daventà in'impurtanta pitga en la vita da las duas figlias ed ils beadis e beadias da Mathilda Derungs.
Era en il Surses hai sbrinzlà
L'assistenta da scola Karin Luzio-Kopp (59) ed il stradin Roland Guntli (58) han emprendì d'enconuscher ed amar in l'auter avant quatter onns. Omadus abiteschan en il Surses, Karin a Savognin e Roland a Cunter. Malgrà ch'els abiteschan uschè da strusch in da l'auter n'èsi il mument nagin'opziun d'abitar ensemen.
Sch'ins ha vivì 15 onns sulet stiman ins sia libertad ed uschia èsi bel da pudair avair intgins dis a l'emna be per sa sez.
I saja bel da pudair far visita in a l'auter, ma era dad avair temp per sa sez e sa sezza. En lur temp liber van els gugent si culm, sin pista u en vacanzas. Lieus e culturas estras è insatge che Roland Guntli ha emprendì dad avair gugent entras Karin.
Ozendi mainan els la relaziun ch'els han gia adina giavischà. Omadus èn gia stads maridads, Roland duas giadas e Karin ha gì ina lètg e da quella èn era ses dus figls creschids. Cura ch'ella haja emprendì d'enconuscher Roland saja ella stada fascinada davent da l'emprim mument. I saja stà charezzia sin l’emprima egliada, di Karin Luzio-Kopp. Dentant hajan las temas dad anc ina giada vegnir offendida d'in partenari procurà, ch'ella n'avessi bunamain betg vulì la relaziun cun Roland. Mo sco la vita giaja, haja ella lura gì in accident sin la loipa e Roland haja guardà uschè bain dad ella ch'ella saja sa decidida da dar ina schanza a quella relaziun. Sin quai di Roland Guntli cun in surrir:
Uschè spert n'avess jau betg laschà ir ella. Jau hai savì 'quella dunna vi jau'.
Charezzia n'ha betg in termin da scadenza
Che charezzia en la vegliadetgna ha sias atgnadads, quai sa era Jacqueline Hindelang. Ella è dapi passa 10 onns experta da terapia corporala sexologica e cusseglia persunas da tuttas vegliadetgnas. E savens era persunas ch'èn s'inamuradas da nov suenter gia esser stadas maridadas u en lungas relaziuns.
Pudair s'inamurar, quai chala mai. Er cun 50 pon ins anc sa sentir sco 20 – giuven e vital.
En sias cussegliaziuns vesa ella era che dunnas ed umens van savens enturn auter cun la nova situaziun. Dunnas hajan savens pli grondas miserias da laschar dar las aspectativas e fetschian tendenzialmain dapli quitads fertant che blers umens sajan abels da giudair il mument. Jacqueline Hindelang cusseglia tuts e tuttas che sa chattan en ina situaziun sumeglianta da betg guardar memia savens dretg u sanester, mabain d'esser avert per tut las experientschas che la vita porschia. Sch'ins haja chattà ina persuna che fetschia bain ad ins saja quai insatge fitg bel, di la dunna da 57 onns ch'è sezza era stada maridada e ch'è ussa puspè en ina relaziun.
E sin la dumonda sch'i dettia lura insumma per mintga chazzetta in viertgel che giaja a prà di ella cun in surrir:
I dat uschè bleras milliardas persunas sin quest mund ed uschè blers èn a la tschertga. L’impurtant è ch'ins è gugent cun sa sez ed era ch'ins è avert per laschar fascinar ina da l'autra persuna.