Satöry
Ils idols da Satöry giaschan da la vart dals AC/DC u dals Motörhead – lur lingia e lingua è pia in hardrock direct e puramain englais. Perquai fan ils Satöry sursilvans surstar cun lur partizipaziun a la retscha da Top Pop dal Radio Rumantsch.
Lur chanzun «Tuttina (tgei che vegn)» è ina ballada amiaivla che undegia tranter folk, country e softpop – purtada da ghitarras ligerischmas e da chors allegraivels – palesond in messadi positiv ed avert: «Vinavon mo vinavon nuot enta peis».
Il quintet è vegnì fundà avant passa 3 onns, ils musicists vegnan da la mesa Surselva e sa chattan mintgamai a Castrisch per las provas. Lur occupaziuns professiunalas tanschan dal spazzachamin sur il camiunist enfin tar il student da giurisprudenza.
Il num da la gruppa han els emprestà dal giapunais; dond al «satori» oriund, ergo a
«l'illuminaziun buddistica», ina metafonia ed in ypsilon sco noda tipica dal gener dir – Satöry. Avant 2 onns è gia cumparì in primalbum da la band («Revelations»), vid primavaira duess suandar il segund. E cun il schlantsch actual speran ils Satöry da concertar bainprest er ordaifer ils cunfins da la Surselva.
Realisaziun
Ghitarra: Ursin Camenisch
Battaria: Dario Jemmy
Chant: Pascal Levy
Bass: Fabio Pimenta (sin foto: Michael Halter)
Ghitarra: Dario Hess
Text: Pascal Levy, Benedetto Vigne, Roland Vögtli
Producziun: Roland Vögtli, Manfred Zazzi
Text da la chanzun: Tuttina (tgei che vegn)
Jeu raquentel dad in siemi
Quel undegia sco in flum
El fa stortas grondas, pintgas
Cun colur, ramur e tun
Igl ei il siemi da mia veta
Kilometers davos mei
Tgei che vegn stat ellas steilas
E miu egl sil passapei
Neu era ti
Neu era ti cun mei
Tuttina tgei che vegn
Igl ei pli sempel cun tei
Las historias secruschan cheu
Sin l'autostrada denter oz e damaun
Jeu raquentel dad in siemi
In che tuorn' ad incuntin
Cumpignia mattutina
E muronzas senza fin
Ils cumpogns da nossa via
Stattan ditg e stattan cuort
E lur fatschas che tarlischan
E sefutran dalla sort
Neu era ti
Neu era ti cun nus
Tuttina tgei che vegn
Igl ei pli sempel cun tei
Las historias secruschan cheu
Sin l'autostrada denter oz e damaun
Vinavon, mo vinavon!
Nuot enta peis
Vinavon, mo vinavon!
Senza pertgeis
Tema mai, ferma mai!
Nuot enta peis
Vinavon, mo vinavon!
E tut quei che vus leis!
Tuttina tgei che vegn
Igl ei pli sempel cun tei
Las historias secruschan cheu
Sin l'autostrada denter oz e damaun