Suenter Surmeir e l'Engiadina fa il Top Pop Rumantsch in gir en Tujetsch: Pascal Gamboni chanta «Il sulegl a tuts».
«Tut ae leeiv, sonda blaua, i picla fin ossum la detta». Las chanzuns da Pascal Gamboni, chantadas en pur dialect tuatschin, èn gia adina stadas in pledoyer per la diversitad colurada rumantscha. Questa qua che porta il titel «Il sulegl a tuts» è però er in laudate ad ina tenuta positiva, ubain sco quai ch’il trubadur di sez, «in’embratschada a la vita, als carstgauns, a l’univers, a l’entir’existenza». Il tun dals artgs, mess a pèr a las ghitarras rockusas solitas, rinforza questa tempra affirmativa.
Pascal Gamboni
Pascal Gamboni, annada 1977, è creschì si a Sedrun, nua ch’el ha fundà ensemen cun Curdin Brugger ils Passiunai, ina gruppa-clav rumantscha dals ultims onns 90. Il proxim decenni ha lura Pascal vivì enl' Engalterra, concertond là cun la gruppa Cléan. Ses albums recents solo «Siat vanauns» ed «As fiug» han confermà sia gronda creativitad. Dapi ses return en Svizra agescha il chantautur tranter auter en in program multimedial ensemen cun il litterat Arno Camenisch (registraziun publica en ils studios 571 / Aquarium a Turitg, ils 8 da december vegnint).
Realisaziun
Musica e text: Pascal Gamboni
Producziun: Manfred Zazzi & Pascal Gamboni
Gruppa rock: Sun Gone Mad (Pascal Gamboni, chant e bass; Severin Brugger, ghitarra; Richard Lee «Tricky», battaria).
Gruppa artgs: Simon Heggendorn, David Schnee
Text da la chanzun: Il sulegl a tuts
Dapli
tut ae leeiv
sonda blaua
i picla fin ossum la detta
esser beinvegnius
ae schi bi
i picla fin ossum la detta
rumpa la crosa
nus essan tuts fatgs in per l’auter
ed ju lasch tier ei
nuet tema d’emblidar
ple bi soi veiramein betg esser
diltutafatg
cun cor aviert
ple bi soi veiramein betg esser
rumpa la crosa
nus essan tuts fatgs in per l’auter
rumpa la crosa ed o cun la rosa
il sulegl saud’a tuts