Il mais da mars preschenta RTR insaquants products e la filosofia da questa interpresa. Iniziants e las olmas da la «Zwickmühle» èn Marina e Karli Zwick. Els èn geniturs da quatter uffants creschids tranter 26 e 41 onns. Gugent fiss la famiglia emigrada en il Canada, ma la situaziun da sanadad da Karli Zwick n’a betg lubì da realisar quest siemi. Uschia vivan la famiglia Zwick dapi blers onns a Masein, la pitschna vischnanca en Tumleastga sin 865 meters sur mar.
Grazia a la fitomedischina sai jau tge ervas che pon gidar l’uman
Avant otg onns è Karli Zwick che lavurava sco viagiatur da commerzi diplomà per in'interpresa da tschigulatta, vegnì attatgà e blessà ferm d'ina banda da delinquents. Causa l'accident ha el pers sia lavur sco viagiatur. Cun strusch 48 onns ha il bab da famiglia be pli pudì lavurar en pensum parzial. Avant dus onns ha Karli Zwick patì in culp da tscharvè, ed uschia ha el stuì tschertgar novas vias per l'existenza.
Che Marina e Karli Zwick han oz ina pitschna interpresa da products natirals è stà in zic casualitad. Lur biadia pativa da neurodermitis. Per mitigiar la malsogna senza medicaments agressivs, ha Karli Zwick tschertgà in'alternativa natirala e creà ses emprim itg da puletg che ha guarì la pel da sia biadia. Grazia a curs e scolaziuns da fitomedischina – la scienzià dad ervas curativas – ha Karli Zwick sviluppà sia savida e stgaffì novs products biologics.
Passa 30 products cun sigil da bio
Marina Zwick Manetsch è oriunda da Glion, ella è emploiada tar il Coop e dasperas gida ella en il manaschi da famiglia «Zwickmühle». Actualmain furnescha la pitschna interpresa products biologics en differents negozis da bio senza emballadi sco «oba aba» a Cuira u a differentas drogarias da la regiun. Actualmain dumbra il sortiment da la Zwickmühle passa 30 products che portan il sigil da bio.
Ils 3 da mars 2020 ha la famiglia Zwick avert la butia «s'klina lädeli - unverpackt verpackt». Quella sa chatta en la Neudorfstrasse 68 a Tusaun. Là pon ins cumprar tut ils products biologics da la «Zwickmühle». Products da bio – da la materia prima enfin l'emballadi. RTR ha pudì visitar il manaschi «Zwickmühle» a Masein e discurrer cun Marina e Karli Zwick.
RTR Nossa cuschina 10:15