Tenor la teologa e preditganta evangelica Hanna Jacobs è il servetsch divin tradiziunal da la dumengia vi da murir ora. En ina columna en la gasetta tudestga «Die Zeit» ha ella dacurt reflectà ses temp sco reverenda a Hildesheim en Germania e co ch'ella prelegeva la dumengia en damaun la messa avant gnanc in tozzel da persunas.
En quest connex sa dumonda ella, sch'i na fiss betg pli scort da stritgar u almain reducir il servetsch divin da la dumengia. E da dar liber uschia temp ed energia che las Baselgias dovrian uschè urgentamain per sviluppar ina nova spierta. Il servetsch divin da la dumengia saja in relict da temps passads, el n'haja betg mo pers l'attractivitad, mabain era la legitimaziun, explitgescha Hanna Jacobs.
Ina renovaziun è tenor Jacobs urgentamain necessaria. Co che umans vivan oz lur cretta en cumparegliaziun cun pli baud, sch'il predi e la communitad cristiana èn ord diever e tge novs formats che pudessan tenor ella emplenir puspè dapli las baselgias, tradescha reverenda Hanna Jacobs en «Vita e cretta».
