RTR Racolta 2023 - Graun e salin, ivas, tirc ed ervas

L’atun è bler memia bel per sa serrar en cuschina u en biro. Perquai va RTR en differentas regiuns dal Grischun a far racolta. Quai mintgamai las mesemnas dals mais settember ed october. Quai en nossa seria RTRacolta ...

Tirc e semenza ad Almens ed a Rodels

Avant 10 onns èn Stephan Stutz e Michelle DeFalque sa chasads ad Almens. Lur passiun: multiplitgar e cruschar da tutta sorts semenza. Dentant han els laschà reviver ina veglia sort da tirc da la Tumleastga ch'è mutada en in project da tirc en la regiun. Or dal tirc che crescha a Rodels sin ina surfatscha da radund ina hectara vegnan fatgs chips da tortilla e pulenta. Enturn mez october vegn il tirc indigen raccoltà, e quai tut a maun. Cunquai ch'i sa tracta d'ina sort da temp passà e na d tirc hibrid fissi gnanc pussaivel da racoltar il tirc cun maschinas. Georgina Janki sin ils fastitgs da la passiun per ina veglia tradiziun.  

Impressiuns da tradiziuns che revivan e da passiuns

Vendemia a Sagogn

Sin 800 meters sur mar han Aron Candrian e ses bab Hannes laschà reviver ina vigna. El medem lieu, nua ch'i deva gia avant 1'300 onns vignas. Sin ina surfatscha da quatter aras madiran las ivas Solaris per il vin «Resvegl». Quest onn èn ellas stadas pli baud ch'usità prontas per la vendemia. Fin settember èn ils viticulturs e lur gidanters ids plain mirveglias a racoltar. Da tge qualitad èn las ivas e daventa il 7avel onn da racolta forsa perfin in da record? Cun anc bler dapli dumondas è Georgina Janki ida cun il microfon a far vendemia.

700 kilos ivas, uschè bleras sco anc mai, èn vegnidas racoltadas. Quai munta ch'i vegn a dar da quai da 600 buttiglias dal vin Resvegl. Ina vegna ed in vin ch'èn atgnmain «scumandads». Il vin na dastga betg vegnir commerzialisà e vendì. Cunquai che la vigna na sa chatta betg en il cataster da vin dal chantun Grischun e n'è era betg sin la dretga autezza. Vin grischun dastga be vegnir cultivà fin 600 meters sur mar, plinavant definescha l'ordinaziun las regiuns da vin. La Surselva na tutga betg tar quella. Cunquai ch'ils Candrians na pon betg vender il vin Resvegl pon ins era experimentar tar la fermentaziun. Ils proxims mais passenta il suc da las ivas Solaris en in'amfora da ton.

In di magnific per racoltar ivas da belezza

Accumpagnar la racolta a Le Prese...

Era en questa ediziun giain nus puspè en direcziun sid, en val Poschiavo. Là visita Gaby Degonda las plantaschas dad ervas e fluras biologicas Raselli a Le Prese nua che Fabrizio Raselli ans accumpogna. RTR ha pudì prender invista dals pli differents process da lavur. Da la racolta enfin il pachet da té pront per la vendita.

Tranter odurs e savurs

.... al puls da la racolta a Parsonz...

L'emprima ediziun ans maina a Parsonz en Surmir sin il bain «Parsonzer» d'Andreas e Ramona Stgier. Gaby Degonda ha pudì accumpagnar la famiglia Stgier a la lavur da scuder il graun che crescha sin 1'400 meters sur mar sin prest trais hectaras per la producziun da pasta e farina «Berg» ma era per il novum per «Parsonzer»: la biera «Berg».

A Parsonz sin ers da graun e salin