Nossa cuschina dal settember - Flurina Candinas: «Jau na sun betg ina tipica pura»

«N’essas vus betg la ...? »

«Bain quella sun jau!», respunda Flurina Candinas a moda simpatica sin la dumonda, sche bain ella saja la victura da l'emissiun «SRF Landfrauenküche». Tals inscunters capitian fitg savens a la dunna da 46 onns. Tant sin via, en stizun, ma surtut era durant sia lavur sco chauffeusa tranter Laax, Falera e conturn.

Fin december 2019 ha Flurina Candinas d'Andiast gudagnà il titel da victura da la sisavla ediziun dad «SRF Landfrauenküche». Regurdanzas vi da la victoria, vi da las stentas da tut la famiglia, vi da l'amicizia cun las concurrentas – ch’èn daventadas amias – chaschunien anc oz pel giaglina e larmas en ils egls, conceda Flurina Candinas.

Dapi quai grond finale e la victoria da l'emissiun dad «SRF Landfrauenküche» èn capitadas bleras bellas chaussas en la vita da Flurina Candinas e sia famiglia.

L'ambient è gist uschè impurtant sco la spaisa. Il giast duai sa sentir bain tar nus.

Ensemen cun ses um Rico Schlosser han els gudagnà l’emissiun «Jaaa – Die Sendung mit Herz» l’onn 2022, in onn pli tard è Flurina Candinas stada giast tar l’emissiun live da Laax «SRF bi de Lüt». Il pli bel regal e gronda surpraisa saja dentant stada l’arrivada da lur terz uffant Lino ch'haja purtà nov slantsch en la famiglia.

Durant il mais da settember ans accumpogna Flurina Candinas en «Nossa cuschina RTR». Ella ans tradescha da ses plaschair per spaisas simplas, ma era da sia motivaziun per porscher ospitalitad ad Andiast sco commembra da «Swiss Tavolata».

Nossa Cuschina cun Flurina Candinas mintgamai la mesemna las 10:15 sin radio RTR.

1 / 12

2 / 12

3 / 12

4 / 12

5 / 12

6 / 12

7 / 12

8 / 12

9 / 12

10 / 12

11 / 12

12 / 12