Gisula Tscharner è bleras chaussas: anteriura teologa, spirituala libra, consorta, autura da cudeschs da cuschinar e probabel per la pli gronda part in uman da la natira. La dunna da 77 onns, che stat cun ses um Angelo a Veulden dorma anc oz ina giada l'emna en il guaud. Equipada cun satg da durmir, bivac, vestgadira impermeabla e notabene senza glisch da giaglioffa.
Jau na dovr nagina matta, il satg da durmir met jau direct sin il funs, uschia sun jau en contact cun la natira.
La natira e dentant cunzunt funtauna per nutriment. Stagiun auta è pervia da quai uss, la primavaira, cura che las ervas selvadias creschan in massas. Lura è Gisula Tscharner da chattar en il guaud cun satgets da plastic ed in cuntè.
En il guaud cun la «Chrütergisi»
-
Bild 1 von 3. Adina cun sai: satgets da plastic ed in cuntè. Bildquelle: RTR.
-
Bild 2 von 3. In lieu cun plantas tipicas da primavaira: Agl d'urs, por selvadi, mintgilettas d'atun e diversas autras fluras ed ervas. Bildquelle: RTR.
-
Bild 3 von 3. Gisula Tscharner a mez ina mar d'agl d'urs en il guaud sur Trimmis. Bunamain tut quai ch'è verd è agl d'urs. Bildquelle: RTR.
Ina «ursa veglia»
Gisula Tscharner vesa sasez sc'ina ursa veglia. Ils 77 onns na ves'ins dentant betg en la fatscha amiaivla da l'experta d'ervas, che vegn era numnada la «Chrütergisi». Or da ses egls blaus traglischa ina confidenza, che na deriva betg d'in studi da biologia u botanica mabain d'ina vita entira d'experienza en la natira.
Gia il bab aveva mussà sco uffant las ervas selvadias en il guaud e gia da pitschen saveva Gisula Tscharner, ch'ella è dachasa en la natira. Davart sia passiun d'ervas e davart ingredienzas sur- e sutvalitadas en la cuschina ha ella raquintà en l'intervista cun RTR.