Da princip vala mintga fotografia sco protegida. Ils dretgs d'autur èn tar la persuna ch'ha fatg la fotografia. Plinavant datti duas cundiziuns:
- La fotografia sto vegnir fatga d'in uman. Traplas fotograficas ubain cameras da surveglianza na valan betg.
- L'object fotografà sto esser en trais dimensiuns. Ina carta geografica u in document na valan pia betg.
Lura pon ins sez decider tge che capita cun la fotografia. Sch'insatgi auter publitgescha la fotografia, pon ins dumandar questa persuna da stizzar ella. Quai vala era per paginas d'internet ubain medias – in'excepziun èn qua maletgs ch'èn da grond interess public.
Avant ch'ins publitgescha ina fotografia vali dentant da survegnir il premis da las persunas ch'ins ha fotografà. Sch'ins metta sin Facebook u Instagram ina fotografia d'insatgi senza che quella vul quai, violeschan ins il dretg persunal. Excepziun èn qua fotografias cun blera glieud en lieus publics sco p. ex. in stadion u ina plazza publica. Là na dovri betg il consentiment da tuttas persunas. Ed i dat era adina la pussaivladad dad ir la via giuridica per defender dretgs da fotografias. Qua vali però da ponderar bain sch'i vala la paina.
