L'App «ePost» dat la pussaivladad da leger las atgnas brevs sin il telefonin, senza stuair svidar la scaffa da brevs.
I dat duas opziuns: Ina versiun gratuita, u in abo per radund 10 francs il mais.
En la versiun gratuita vegnan tramessas las brevs da partenaris da la Posta a moda digitala. Tut tschellas brevs vegnan vinavant a moda fisica. Era èsi pussaivel da pajar quints direct or da l'app, tranter auter fan era la Banca chantunala Grischuna e la Raiffeisen part.
Tar la versiun pajada pon ins nizzegiar in servetsch da scannar. Alura vegn quasi tut la posta digitalisada automaticamain. Be sche quai na va ina giada betg, avra insatgi la posta e fa quai a maun. Quels collavuraturs èn dentant suttamess al secret postal.
Brevs da votar u eleger, sco era cartas da banca u bigliets per concerts etc. vegnan vinavant tramessas fisicamain, cunquai che quai na po betg vegnir remplazzà cun ina versiun digitala.
