Uffants èn savens pli motivads d'emprender vi d'in tablet u telefonin che sch'il pensum sa chatta sin in palpiri – quai grazia a l'aspect interactiv ed il caracter da gieu che las apps han per regla. La selecziun d'apps d'emprender ch'i dat en l'«App Store» è ualti gronda, i po pia esser grev p. ex. per geniturs, da tscherner quellas che fan propi senn. Perquai vain rimnà criteris ch'èn da resguardar cura ch'ins elegia in'app, per ch'il temp che vegn passentà vi da l'aparat n'è betg mo in termaglim, mabain sustegna il process d'emprender da l'uffant da scola sin moda effizienta e cun senn.
Criteris d'apps che fan senn
- Evitar distracziuns: naginas reclamas, design simpel e survesaivel
- Adattaziun: l'app ha l'opziun d'eleger cuntegns e temas ch'èn addatads per la vegliadetgna ed ils basegns da l'uffant (qua rendi era da dumandar il scolast u la scolasta tge cuntegns ch'i fa actualmain senn da repeter u emprender)
- Attenziun tar pussaivladads da cumprar funcziuns entaifer l'applicaziun. Quai vegn savens er nizzegià per far raps.
Tge datti uscheglioc anc da resguardar?
- Limitar il temp: Apps duain cumplettar e betg remplazzar cumplainamain autras furmas d'emprender. Suenter in tschert temp perdan ils uffants er l'attenziun e lura va il senn da l'app a perder. Uschia vegn era evità ch'i sa sviluppescha ina tscherta dependenza.
- Asisster l'uffant: Magari n'èn pensums betg declarads uschè cler. I renda pia da tegnair in egl sin l'uffant cura ch'el u ella lavura per dar sustegn nua ch'i drova.
Exempels d'apps adattadas
Qua trais exempels d'apps ch'adempleschan ils criteris numnads e vegnan per part era integradas ed utilisadas da scolastas e scolasts en las classas:
- Anton: L'app pon ins utilisar gratuitamain. Ella porscha cuntegns da divers roms ed è adattada per uffants da l'emprima fin la 10avla classa. Geniturs e persunas d'instrucziun pon eleger ils cuntegns adattads e vesan tgenins pensums che l'uffant ha schlià e quant ch'è correct.
- Scoyo: Tut tenor abo custa l'app circa 15 Euros. Il princip è fitg samegliont sco tar «Anton». Era tar quest'app pon geniturs eleger cuntegns adattads e persequitar il progress da l'uffant.
- Antolin: Quest'app vul motivar specificamain ils uffants da leger dapli per meglierar las cumpetenzas da leger. La differenza da quest'app è ch'i drova cudeschs fisics sco basa. Savens datti quels en la biblioteca da la scola – i renda pia da dumandar suenter. Sin l'app chattan ils uffants divers quiz e gieus tar blers differents cudeschs ch'els pon schliar suenter ch'i han finì il cudesch. L'app è gratuita.
