Badilatti è la pli veglia brassaria da café dal Grischun. Ina istorgia da passa 100 onns porta la brassaria gia cun sai. In lung temp nua che l'industria da café è era sa midada fermamain. In grond midament han las maschinas da café fatg. Tras las maschinas da capslas è il consum da café sa midà.
In auter aspect ch'ha midà il mund da café, l'unda da baristas. Ozendi datti perfin concurrenzas da baristas. Tgi fa il pli bel café? Tgi fa il meglier café. Far café è daventà art. Café n'è betg pli mo in product dal mintgadi mabain er in product da moda. Per Daniel Badilatti, proprietari da la brassaria Badilatti èn ils cafés da capslas in bun product, cun quai ch'il café è adina il medem. Tuttina n'èn las capslas betg la varianta optimala. La varianta la pli optimala è sch'ins po moler sez il café, drizzar en sez tenor gust la maschina.
L'atmosfera da far café va a perder cun ina maschina da capslas.
Daniel Badilatti ha manà la brassaria en la terza generaziun. Dapi il 2019 ha el surdà la mainagestiun a Sabina Cloesters. Badilatti è però tuttina ensemen cun ses figls en il cussegl administrativ. I na saja betg stà simpel da dar davent la firma en mauns senza il num Badilatti. Uschia hajan ins er in curt mument gì l'idea da vender la brassaria. Grazia al cuffort da la famiglia, s'ha però decis da tegnair la brassaria vinavant. La speranza che Daniel Badilatti ha in di biadis u biadias che pudessan surpigliar il manaschi è qua.
Forsa che la tschintgavla generaziun Badilatti è puspè en l'operativa da la brassaria.
Durant tut ils decennis cura che Daniel Badilatti ha lavurà per la firma, ha el era fatg blers viadis. Las pli bellas regurdanzas ha el vi dals inscunters cun tut las persunas. El era savens en l'Indonesia per bajegiar si las plantaschas. La han el era scolà ils purs, per ch'els possian lura en avegnir lavurar autonom.
Café è in product che vegn anc oz cultivà d'umans.