Nus essan ids lunsch enavos en noss archiv. Numnadamain fin l'onn 1951 – là è stada l’emprima cursa da muntogna da Casti a Lai cun participaziun da Marthe Guldimann, ina da las paucas dunnas Svizras che sa participava a cursas da cirquit e cursas da muntogna.
L'istorgia
Adina puspè èn persunas da la val d’Alvra stadas da vesair en la televisiun. Qua in pitschen sguard enavos da diversas emissiuns dals onns 1990, sco il quiz da Péz a cup e Direct da Lantsch:
Tge fiss il Grischun Central senza nossas vias. Ins sto gnanc ir lunsch enavos en noss archiv per guardar, sco che tut è creschì. Il 1973 è vegnì perfurà il tunnel da la Landwasser en direcziun Tavau, suenter il 1976 la via dal Meir/Schyn, ed il 1999 è vegnì avert il sviament da Casti.
Strusch in’emna, ch’il luf n'è betg puspè en las lingias grassas. Grond tema da quest onn è stà la regla, che er chatschaders pon sajettar lufs, sch'i visitan in curs. En sasez è quai nagut da nov. Gia l'onn 1978 han chatschaders fatg chatscha sin in luf, sco la contribuziun da l'onn 1996 sa regorda vi dal di, nua che Benedikt Nadig ha sajettà giu in luf.
La fabrica da biscotg/Zwieback e merengas da Surava tutga tar ina da las interpresas grischunas, ch'han gia ina lunga tradiziun en Val d’Alvra. Il 1999 è la fabrica vegnida serrada – pir 4 onns avant aveva ella festivà il giubileum da 100 onns. Qua in pitschen sguard enavos en il passà – l'onn da giubileum.
Fertant ch’ils ins manaschis èn svanids, èn auters vinavant existents. Ed anc ina giada auters, èn mai vegnids realisads. Sco il project da l’aua minerala da Bravuogn, ch'ha malgrà grondas speranzas, fatg naufragi. Dapli success han gì – sche er be temporarmain – il bogn dad Alvagni, e la surbajegiada gronda da Vazerouls. Ed er il lai da fermada Nisellas è ina giada stà tema.
L'onn 1988 ha gì lieu a Casti per l’emprima giada la EMBA, l’exposiziun per mastegrn. Organisada è ella vegnida da la Regiun Alvra e Surses.
Vegnin tar la lingua rumantscha: En la Val d’Alvra e gist er en scola ha il rumantsch gì grev ils davos decennis. Uschia er il dumber d’uffants che discurran rumantsch a chasa è ì enavos ferm. Ils onns 1980 e 1983 ha il Telesguard rapportà da Zorten, Lain e Muldain – fracziuns da Vaz, e da Barvogn, nua ch’il rumantsch era adina pli pauc dumandà.
Betg adina va tut uschia sco ch’ins avess gugent. Il 1995 hai dà in brischament ad Alvagni ed er il «Rutsch» da Brinzauls ha gia l'onn 1984 – damai avant exact 40 onns, chaschunà mal il chau …
Vegnin tar l’agricultura: L’alpegiaziun ha ina gronda tradiziun en il Grischun, dal 1974 datti in video da l’inauguraziun da l’Alp Lavoz. L’onn 1985 e l’onn 2003 è il pavel stà stgars – ina giada hai schizunt dà l'agid da l’armada Svizra.
Ina curiusadad avain nus chattà a Stierva. Là han ils uffants da Stierva l'onn 1981 gidà da trair ils novs zains sin il clutger da la baselgia catolica – ina gronda tradiziun han er ils stailers, che la televisiun rumantscha ha visità il 1980 a Lantsch, ed il 1990 ad Alvagni. E l'onn 1973 è la baselgia Mistail vegnida restaurada.
Perquai ch'el ha gì memia paucs commembers, è il Chor viril d’Alvra vegnì schlià l'onn 2012. Il davos aveva el anc 20 chantadurs, tuts en ina vegliadetna pli auta. Perquai as reguardain gugent vi da l'onn 1994, nua ch’il chor ha exercità per la Veia dalla Crousch da Peder Cadotsch ed Alvin Muoth.
«Tge mond Pitang»: Quai è stà l'emprim toc dal Teater Alvra ch’è stà activ durant 20 onns per gronda part sut la batgetta da Philipp Lenz, l'onn 2013 esi stà finì. Nus ans regurdain anc ina giada vi da l’entschatta – e sco finiziun, vesain nus in extract dal festival da teater da Tusaun, l'onn 1998 per l'emprima giada er cun uffants, naturalmain da la Val d’Alvra.
L'onn 1982 è Bernard Fallet da Bravuogn vegnì festivà sco president dal Cussegl grond. Igl è stà ina gronda festa cun trumbettas e paucas. E sch'ins guarda bain – ves'in che pli baud eran talas festas anc pli pumpusas che oz. Bernhard Falett da la PPS è naschì il 1922 e mort il 2008.
Tona il rasteler: Gion Antona Candreia ha vivì ils onns 1902 – 1980 a Stierva. El è creschì si en circumstanzas modestas. El era pur, lavurer da guaud e da vias, scrivent e rasteler. En il video da l'onn 1970 as regurdain anc ina giada vi da Tona, il rasteler.
Regularmain ha la televisiun rumantscha visità lieus da la Rumantschia, uschia er Brinzauls. Qua in extract d’ina reportascha da Brinzauls, cura ch’il pasterner vegniva anc regularmain en vischnanca perquai ch'i na deva nagina butia pli.
Avant circa 40 onns è vegnì avert ad Alvagni il Musikhaus Kollegger. La chasa da musica vala sco fatschenta spezialisada impurtanta per la musica populara. La televisiun rumantscha ha fatg visita curt suenter l’avertura.
