Musicists cultiveschan l'ierta dals Fränzlis
Il vagabund Franz Josef Waser è mort 1895 cun mo 37 onns. Dad el exista nagina fossa e mo paucas fotografias. Dentant: Waser ha laschà enavos bleras cumposiziuns musicalas. Differentas persunas han nudà suenter la mort da Waser ses relasch musical sin palpiri cun tuns e notas.
L’emissiun Svizra Rumantscha è sa messa 1983 sin ils fastizs da Franz Josef Waser e ses Fränzlis da Tschlin.
Ils novs Fränzlis da Tschlin
L'onn 1982 sa furma ina nova chapella cun il num «Fränzlis da Tschlin». Fundada vegn quella dals frars Janett da Tschlin.
En in'emissiun Battaporta dal Radio Rumantsch 1984 preschenta in dals fundaturs, Domenic Janett, la nova furmaziun che vul tgirar vinavant la musica populara da Franz Josef Waser.
Musica per sautar
Ina emissiun da la Televisiun Svizra DRS preschenta 1991 sauts e chanzuns popularas da l’Engiadina. Ils Fränzlis da Tschlin dattan en il tun e mussan che lur musica è sco fatga per il saut.
Musica populara grischuna meets jazz
Novs cunfins surpassan ils Fränzlis da Tschlin il 1995. Els gughegian da cumbinar lur musica populara cun musica d'orchester da chombra e musica da jazz. L'emissiun Svizra Rumantscha rapporta da quest experiment.
Live sin il palc – ma era giud la conserva
Ils Fränzlis da Tschlin dattan fitg blers concerts, nua ch’ins po vesair live lur abilitads e qualitads musicalas. Ina part da lur musica han els dentant era registrà. L’emprim disc cumpact «Pariampampam» cumpara 1996. Dals proxims dus discs rapporta la Televisiun Rumantscha.
Ils Fränzlis da Tschlin sin CD
Ils commembers tar ils Fränzlis da Tschlin:
- Flurin Caviezel: 1982 - 2001
- Anna Staschia Janett: dal 2014
- Cristina Janett: dal 2012
- Curdin Janett: dal 1982
- Domenic Janett: dal 1982
- Duri Janett: 1982 - 2012
- Madlaina Janett: dal 2001
- Men Steiner: 1982 - 2014
In quart tschientaner Fränzlis da Tschlin
Il 1982 han ils frars Janett fundà «ils novs» Fränzlis da Tschlin. Il 2007, cun adina puspè midadas da persunal, po la furmaziun festivar il 25avel onn d’existenza. Il Telesguard rapporta d'in concert da quest onn ch'ils Fränzlis dattan en l'Appenzell.
RR actualitad 11:00