Jazz en Engiadina
Il musicist Pius Baumgartner è creschì si en l’Engiadin’Ota cun la musica populara – el suna la clarinetta. Cun frequentar la scola da musica da jazz a Son Gagl ha el midà sin il saxofon. Ma viver da la musica da jazz n’è betg pussaivel. L'emissiun Svizra Rumantscha ha purtretà il giuven musicist il 1995 en sia patria.
Per mai è jazz il stil da musica cun il qual jau poss m’exprimer il pli bain.
Jazz en Surselva
El è interprendider e maina ina fatschenta da bavrondas a Glion. Ses temp liber deditgescha Jürg Oswald a la musica da jazz. Entschet ha tut cun la flauta, pli tard ha el sunà la clarinetta. Per pudair sunar en ina band ha el midà sin il saxofon. Il Telesguard ha visità il 1997 il musicist passiunà a Glion.
Senza musica na pudess jau betg s’imaginar da viver.
Jazz en Rezia
Plirs musicists da professiun dal Grischun sa mettan ensemen il 2002 e decidan da producir ina CD cun musica da jazz. La band survegn il num da ses manader Andi Schnoz, la «SchnoZgroup». Il Telesguard ha accumpagnà ils jazzers grischuns durant la producziun da la CD «Chadafö» a Turitg.
Jau na crai betg che nossa musica saja elitara, quai è mo in zic in image ch’il jazz ha.
Jazz e chant
Èsi pussaivel da fusiunar la musica da jazz cun il chant d’in chor? Da quest experiment da las duas furmaziuns Jazzorchester Club Descarga e Jazz-Chor Arcas Syncopics rapporta il Telesguard l'onn 2007.
Wenn alles zusammen kommt und schwingt, das ist überwältigend.
Jazz d’ina dunna
La musica da jazz è per gronda part ina musica che vegn interpretada dad umens. Mo paucas dunnas fan musica da jazz. En il Grischun mussa il Telesguard il 2011 co Ursina Giger interpretescha il jazz durant in concert.
Jau hai gugent melanconia. Happysound è per mai memia kitschig.
Jazz emnil en la chapitala grischuna
L’entschatta dal nov millenni iniziescha il musicist Rolf Caflisch il Weekly Jazz en la sala da l'Hotel Marsöl a Cuira. Emna par emna sa preschenta ina nova furmaziun sin tribuna. Las cumbinaziuns èn variablas, il stil da musica è dà: il jazz. Il Telesguard ha discurrì il 2012 cun l’iniziant dal Weekly Jazz.
Interessant èsi d’interpretar chanzuns da films da comics, per exempel la musica dal Viking «Wickie» en stil da jazz.