Duas giadas gieus olimpics a San Murezzan
Tar ils emprims gieus olimpics d’enviern a San Murezzan il 1928 cumbattevan las sportistas ed ils sportists en 14 disciplinas per medaglias. 20 onns pli tard, il 1948, en 22 disciplinas. Ozendi mo pauc pli che regorda als gieus olimpics da San Murezzan. Il Telesguard era stà il 2008 sin ils fastizs dals gieus.
Sapporo 1972 cun atlets rumantschs
Che Bernhard Russi ha gudagnà la cursa rapida als gieus olimpics a Sapporo en il Giapun è enconuschent. Main enconuschent è che las equipas da passlung e da bob eran bain dotadas cun atlets grischuns. Il Balcun tort aveva laschà raquintar quels avant la partenza en il Giapun da lur siemis da medaglias.
Nagin bainvegni suenter il return da Sapporo
Tar il return dal passlungist Giusep Dermon dals gieus olimpics da Sapporo n’hai dà nagin bainvegni. A la plazza aviatica a Turitg ha mo in buob dumandà in autogram. En sia patria a Mustér n’ha nagin beneventà el. L’atlet è stà fidaivel al passlung fin al di dad oz. Il Telesguard aveva visità Giusep Dermon 40 onns suenter ils gieus olimpics en sia nova patria en il Liechtenstein.
Regurdientschas d’Engiadinais dals gieus olimpics
Adina puspè fatg part ni collavurà per gieus olimpics han persunas da l’Engiadina. Il schurnalist da RTR Jachen Prevost aveva laschà raquintar quatter da quellas persunas ils onns 1990 reminiscenzas da differents gieus olimpics.
Marcella Maier – gieus olimpics San Murezzan 1948
Ina da las persunas ch’ha lavurà per l’organisaziun dals gieus olimpics il 1948 a San Murezzan è Marcella Maier (*1921).
Dumeng Giovanoli - gieus olimpics Grenoble 1968
Il hotelier pensiunà da Segl Dumeng Giovanoli (* 23.01.1941) è ì il 1968 sco favorit en la disciplina ski alpin slalom als gieus olimpics a Grenoble en Frantscha.
Werner Camichel – gieus olimpics Sapporo 1972
Il magister da sport ed atlet da Zuoz Werner Camichel (* 26.01.1945 - † 27. 03. 2006) ha pudì sa partecipar il 1972 als gieus olimpics a Sapporo, ils emprims en Asia. Werner Camichel fascheva part da l’equipa dal bob a quatter da Jean Wicky.
Giachem Guidon – gieus olimpics Sarajewo 1994
Il passlungist da Bever Giachem Guidon (*04.09.1961) è sta passlungist dal 1982 fin il 1994. El ha fatg part 4 giadas a gieus olimpics. Ses meglier resultat è stà la 12 avla plazza tar ils 15 km da la concurrenza da passlung a Sarajewo l’onn 1984.
Il cumbat per gieus olimpics il 1988 en il Grischun
40 onns suenter ils davos gieus olimpics en il Grischun (1948 a San Murezzan) duevan ils gieus puspè vegnids organisads il 1988 en noss chantun. Ma las opiniuns eran divididas. Quai era vegnì fatg transparent il 1980 en il Telesguard.