Anc adina stain nus qua ed ans dumandain sco ch'il genocid ch'ils nazis han commess envers ils Gidieus è insumma stà pussaivel. Daco han milliuns da Tudestgs sa laschà surmanar da Hitler ed han strusch fatg resistenza.
«Genocids na dattan betg giu da tschiel», scriva Sebastian Haffner en ses cudesch captivant «Geschichte eines Deutschen». A Berlin ha Haffner prevesì la catastrofa gia ditg avant che Hitler è vegnì a la pussanza.
«Il terren era preparà, nus eran gia nazis en ils onns 20» di Haffner. La Germania saja stada gia alura sin il precint da perder sias valurs e pactar cun il diavel.
