Il forum 2009-2010 - Schuar, ansuar u sauar – l’aua da roda per tuts
Tgi che va en vacanzas en il Valais va magari a guardar ina “Suone” u ina “Bisse”. Quai èn quels chanals che servan per purtar l'aua dals glatschers per sauar la prada e las vignas.
Era en il Tirol dal sid èn ils “Waale” daventads ina attracziun turistica. Lur num vain dal pled rumantsch aual. Dentant era en Grischun han noss perdavants sauà la prada atras dutgs e clamagnuns.
La veglia tecnica da sauar è oz ida a perder, ha dentant sa mantegnida en la lingua: Sche nus udin a dir en Surselva “quei va grad sco l'aua per canal” sche po quai sa referir ad ina tuna, ad in blagunz, bavader u sfarlattader.
