Sco "Frau Oberst" accumpogna Regula Engel ses um Florian, in uffizier grischun dal regiment svizzer en Frantscha, en sias campagnas militaras tras l'entira Europa. Sche i fa da basegn cumbatta er ella en l'armada da Napoleon cun il sabel enten maun. Ella ha dentant era parturi en tut 21 uffants. La sconfitta da Napoleon a Waterloo (1815) è er la terrada da la famiglia Engel.
Regula Engel perda en questa battaglia ses um sco era dus figls. Adumbatten s'embartga ella per l'America a la tschertga d'in figl. Paupra sco ina mieur-baselgia passenta ella ils ultims 30 onns da sia vita a Turitg.