Ella era la figlia unica d'in dals pli pussants aristocrats grischuns da ses temp. Ses amant, Nicolaus Christ von Santz da St. Antönien, era in novritg e convertit catolic. Il bab Peter von Planta-Wildenberg da Zernez, s'ha dustà cun mauns e pes cunter quest'allianza. Lur matrimoni secret dal 1785 a Tarasp e l'arrestaziun da la figlia tras il bab ha occupà la Dieta da las Trais Lias, l'uvestg da Cuira e la diplomazia europeica.
L'istoricher Adolf Collenberg raquinta d'ina da las pli spectacularas e tragicas amurs en l'istorgia grischuna.