Ins veglia porscher dapli per la generaziun giuvna che stimia la purschida, scrivan las pendicularas da Zermatt. Ils profis da Swiss Ski, dentant er da'autras federaziuns, na san uschia betg duvrar il glatscher sco lieu da trenament.
RTR ha pudì discurrer cun Markus Hasler, il CEO da las pendicularas da Zermatt davart la decisiun. Sco el di saja in motiv per questa decisiun che curridras e curriders èn s'exprimids adina puspè a moda negativa sur da las cursas a Zermatt/Cervinia che avessen gì lieu ils ultims onns mintgamai il november. Pervia da la mal'aura han questas cursas dentant mai pudì vegnir realisadas e per il proxim onn ha FIS prendì ora las cursas dal chalender. Plinavant èn er ils trenaments a Zermatt adina puspè vegnids crititgads da trenaders e skiunz. Pervia da quai han las pendicularas reponderà la situaziun e decis che l'elita da skis na sa betg trenar la stad 2024 sin il glatscher.
Tenor Markus Hasler saja quai ina decisiun consequenta da las pendicularas. Sch'ins haja in product sin fiera che n'è betg giavischà, lura vegn quest product prendì davent da la fiera. Co ch'i guarda ora en l'avegnir cun trenaments d'elita a Zermatt n'è anc betg cler. Markus Hasler di dentant ch'el è persvas ch'il sport da skis professiunal turna baud u tard puspè a Zermatt.
