A Zermatt/Cervinia na datti suenter las duas cursas dals umens da la fin d'emna passada era betg cursas rapidas da la cuppa mundiala da las dunnas. La raschun per l'annullaziun da la sonda e dumengia è il vent memia ferm. Uschia ha l'aura impedì tut las cursas ch'eran planisadas.
Gia il trenament final era vegnì annullà
Il trenament final per las cursas rapidas da las dunnas a Zermatt/Cervinia era vegnì annullà il venderdi. La raschun era lura ferm vent. Cun quai han – sco era gia avant in'emna ils umens – era las dunnas gì be in trenament per las cursas.
Austriacas en furma en il trenament
Gievgia han las skiunzas pudì trenar per la nova cursa rapida da Zermatt. Las Austriacas èn stadas las pli spertas. Gist trais dad ellas èn sa plazzadas en las top 4. Christina Ager è stada la pli sperta, Emily Schöpf la segund sperta e Christina Scheyer è ida sin plaz 4. Terza è vegnida la Tudestga Kira Weidle.
Corinne Suter è stada la meglra Svizra sin plaz 5, sin Ager ha ella pers 0.93 secundas. Michelle Gisin è vegnida 11avla. Jasmine Flury ha pers sco 43avla passa 4 secundas, Lara Gut Behrami ha manchentà ina porta ed ha er pers bler temp.
