Tradiziunalmain è la lutga da primavaira per ils lutgaders grischuns il tun da partenza en la nova stagiun. Nagina surpraisa n'è ch'il lutgader da Maiavilla Armon Orlik ha gudagnà l'occurrenza a Trimmis quest onn. En la lutga finala ha Orlik mess Christian Biäsch da Tavau Sertig en il resgim suenter 1 minuta e 6 secundas. Quai cun in Fussstich.
A la lutga a Trimmis èn sa participads en tut 66 lutgaders. L'occurrenza ha attratg passa 600 aspectaturs ed aspectaturas.
I vegn serius – ils emprims cumbats
Suenter blers mais da trenament pon ils lutgaders grischuns trair per l’emprima giada vi d'in adversari. Er sch'i na dat anc da gudagnar nagins cranzs durant la lutga da primavaira è quella l’emprima occasiun da vesair nua ch'ins stat.
Christian Biäsch vul far il proxim pass
Per il lutgader da Tavau Sertig era la stagiun passada la meglra en sia carriera. Il lutgader da 28 onns ha gudagnà quatter cranz. A la fin è el era stà bun d'ir per il cranz tar la festa da la Svizra dal Nordost NOS a Mollis. Per quel cranz ha Biäsch lavurà ditg. El ha intensivà il trenament per vegnir anc meglier e las stentas han valì la paina.
Biäsch è dapi la stagiun passada lutgader cun in cranz surchantunal. Sper il leader Armon Orlik è el uschia sin il palpiri il segund ferm lutgader grischun. Durant questa stagiun sa legra Biäsch sin la lutga grischuna-glarunaisa il mez da fanadur tar el a chasa a Tavau. E vul confermar sia prestaziun da la stagiun passada tar la festa NOS a Meilen en il chantun Turitg.
Marc Jörger cun retard en il trenament
Anc l'atun ha Marc Jörger stuì laschar operar il nas. Uss suenter in pèr mais po el puspè trair bain flad e po far la lutga quasi senza impediment. Suenter l’operaziun dal nas ha Marc Jörger dentant stuì avair pazienza. Enstagl da turnar gia il november sin il resgim durant ils trenaments da lutga, ha el cumenzà pir durant l’onn nov da far la lutga. Perquai è el anc in zichel en retard cun il trenament e n'ha betg pudì trenar durant ils mais d’enviern uschia sco ch'el vuleva quai. Pazienza dovra quai er durant las emprimas lutgas. Perquai prenda Marc Jörger emna per emna. El di da sasez ch’el prenda tut in zichel pli luc.
